KABONG: Tiga iku peranak Sungai Pudu Ulu Roban nyau deka bebadi nyawa tepagang laban ai pasang lebuh ngiga obor-obor.
Ketuai Balai Bomba enggau Penyah Penusah Saratok PPgB Nazry Mohamat madah, lima iku kaban ari Balai Bomba Saratok betuaika PBK Kho Boo Jang beguai ngesah nuju pala penusah pengudah nerima kanggau ari mensia mayuh urung pukul 3.19 lemai kena 25 Mac tu tadi.
“Nitih pansik tumu, sida layap ngiga obor-obor ngujung sida enda sedar ke ai tasik majak pasang.
“Datai maya mansa sedar, ai tasik endang udah pasang menuh ti ngujungka entukar bansa hilux ke dibai dampih alai begiga obor-obor udah penuh laban ai ti ngujungka injin enggai agi idup,”ku Nazry.
Nazry madah munyi nya ba sebengkah penerang nuju pemberita lemai kemari pengudah tembu pengawa nyelamat mansa ba Pantai Alit kemari.
Nambah nya ku iya, sida tiga iku iya nya Jose Tirin Digon,27 taun,Ignatius Jubin Phillip,23 taun enggau Digon Enching,60 taun ke mega Tuai Rumah Sungai Pudu,Ulu Roban tepagang ba tengah tasik pengelama dua jam enggau penyauh urung satu kilometer ari tebing tasik sebedau diselamat ke perau orang berikan penatai asal ari Alit.
“Pengudah nemu entuka enda ulih dikena ke tebing agi,sida tiga bela nguji sama nyemerai sebedau disaup sebuah perau orang berikan penatai asal ari Alit ti benung enda jauh ari endur nya.
“Siku ari mansa iya nya Tr.Digon ditaban berubat ulih mensia mayuh ti sama bisi ba palan nya ngagai Klinik Pengerai Simpang Nyabor pengudah madah diri bisi berasai pandak seput,”ku Nazry nerang.
Taja pia, entukar hilux Digon udah mujur ditarit ngena piko pulai ke tebing tasik.
