TEBEDU: Perintah Sarawak ngagihka RM1.26 bilion dikena bejalaika bemacham projek pemansang ba sitak Kunsil Nengeri (DUN) Tebedu dikena nambahka rentayan penyambung, ngeranchak aktiviti ekonomi enggau nambahka pengelantang peranak menua pesisir.
Sapit Premier Sarawak, Datuk Amar Douglas Uggah Embas madah, agih belanja nya ngaul pengawa ngaga mayuh projek strategik nyengkaum ngaga jematan, jalai genturung pendiau, jalai kebun sereta nyendiaka perengka guna infrastruktur pemun ke ulih ngerandang mayuh agi peluang ekonomi ngagai peranak menua.
Ku iya, entara projek ke dilanggur nyengkaum pemansang Hab Ekonomi enggau Main Asal Tebedu ke dikemataka Opis Kereja Raya (JKR), kelimpah agih RM160 juta nengah Agensi Pemansang Tanah Tinggi (GKCDA), RM10.48 juta nengah Unit Pekara Pengarap Bukai (UNIFOR) serrta RM2.6 juta ungkup pemansang sekula mission.
Iya nyebut jaku nya maya bejadika Pengawa Bejadi Projek ba sitak DUN Tebedu ke diatur di Balai Mayuhguna Kampung Temong Mawang ditu Hari Satu.
Ngenang silik, ku iya, entara projek besai ke benung diberi perati iya nya ngaga Jalai Temong Tepoi/Sadir Renggat 2 berega RM48.188 juta ke deka meri pemaik ngagai urung 3,000 peranak ari tujuh genturung pendiau.
Genturung pendiau ke kena renchah iya nya Kampung Temong Bengan, Kampung Temong Putah, Kampung Temong Mura, Kampung Temong Mawang, Kampung Darul Falah, Kampung Darul Huda enggau Kampung Tepoi.
Nya alai, iya ngarapka kontraktor ulih ngerumban projek nya ngambi ulih tembu Jun 2027 enggau nentuka kualiti projek sereta nitih spesifikasyen standard R3 seruran diperati.
Iya nerang, pengawa ngaduka jalai alun ukai semina ngasuh peranak nyamai mindah aja, tang ulih nambahka aktiviti dagang, betanam betupi enggau pengawa bejual, lebih agi di Pasar Tebedu.
Ngenang pekara bekaul, iya bela madahka perambu ngaga 22 jematan sereta jalai penyambung ba selampur Sarawak ke disadang negapka sistem penyambung sereta ngemansangka mayuh agi menua ngagai pemansang ekonomi. — EDISI UKAS




