KUCHING: Lebuhraya Borneo Utara Sendirian Berhad (LBU) udah nyuaka pemeri penyampau RM1 juta ngagai Wang Turu Bantu Penusah Ngenyit Sarawak.
Chek udah disuaka Direktor Pengatur Pengawa LBU, Mohamad Zaidee Abang Hipni ngagai Chairman Komiti Penyangga Penusah Ngenyit Nengeri (JPBN), Datuk Amar Douglas Uggah Embas ba sebengkah pengawa diatur ba Wisma Bapa Malaysia, ditu kemari.
Ku Mohamad Zaidee Abang Hipni, tuju sida deka mantu peranak Sarawak kena empias ari pengerekai igi penyakit Covid-19.
“Kami sedar tebal agi rayat napi pemar ari penusah besai ke nuntung menua jam diatu.
“Tambah mega, tu sebagi ari Tanggungpengawa Rama Korporat (CSR) kami ngagai komuniti,” ku iya nerang ngagai pemberi.
Naka diatu, LBU chakah ngatur program CSR ngaul pengawa ngaga sebuah sekula baru ungkup Sekula Primari (SK) Kampung Buda, Spaoh, Betong beungkus RM2.8 juta lebuh sekula nya rusak ketegal penusah tanah tusur.
