MIRI: Perintah Besai udah meri agih belanja RM10.4 juta dikena nyeleti jalai Perintah Besai lama ba Miri, ku Menteri Kereja Raya, Datuk Seri Alexander Nanta Linggi.
“Aku bisi dipadah Opis Kereja Raya (JKR) Sarawak ti madahka penyampau nya enda chukup dikena nampung semua projek ti dipelaba beungkus urung RM25 juta.
“Kebuah pia laban bisi penanggul bekaul enggau ungkus dikena nyeleti laban gaya jalai ti majak tuai ukai semina nyadi ba Miri tang ba selampur menua.
“Nya alai, dikena nyeleti semua jalai tu begunaka agih belanja abis nadai RM3 bilion,” ku iya.
Nanta mansutka jaku nya rambau aum pemberita pengudah matau perambu enggau pejalai projek infrastruktur Jalai Perintah Besai ba Miri ditu, kemari.
Iya beterima kasih ngagai Perintah Besai laban udah ngemendar agih belanja nya ngagai opis menteri sida dikena nyeleti jalai nya.
Iya madah, opis menteri sida deka minta mayuh agi agih belanja ungkup pengawa nyeleti jalai Perintah Besai ba nengeri tu.
Ngelansa senentang status pemadu baru projak Jalai Besai Pan Borneo ti mungkur jalai Sungai Tangap ngagai Pujut Link, ku iya, pengawa ngaga jalai lambung ba Seksyen Lambir udah manggai 97.45 peratus.
“Semua projek Jalai Besai Pan Borneo Sarawak (ari Telok Melano nyentuk Miri) disadang temu penuh ba bulan April tu ila,” ku iya.
