SEBUYAU: Sepenyampau RM10 juta diagih ngaga GiatMARA ditu dikena nyendia servis latih pengelandik ngagai nembiak kelimpah meri pemaik ngagai sida ngulih pengawa puang.
Sapit Menteri Besai, Datuk Seri Ahmad Zahid Hamidi ngerah ngambi pengawa ngaga palan latih nya ulih dipejalai lengkas ba taun tu.
“Aku deka mantu peranak ditu ngambi nembiak muntang bulih latih dikena sida ngulih pengawa puang.
“Nya alai, aku meri agih belanja RM10 juta dikena ngaga GiatMARA ditu.
“Pia mega, aku deka ngerah direktor Kaunsil Amanah Rayat (MARA) enggau GiatMARA matau pengawa ngaga begunan tu ngambi ulih berengkah dipejalai ba taun tu,” ku iya.
Zahid mansutka jaku nya rambau Program Ngaul Rayat ba Sekula Primari (SK) Haji Bujang Sebangan ditu, kemari.
Iya ti mega Menteri Pemansang Menua Pesisir enggau Wilayah (KKDW) madahka diri deka minta agih belanja ti besai agi dikena ngemansangka sekula repuk kelebih agi ba Sarawak.
Iya madahka diri balat ngemerat peminta ADUN Sebuyau, Datuk Julaihi Narawi bekaul dua sekula repuk ditu iya nya SK Haji Bujang Sebangan enggau Sekula Sekondari (SMK) Sebuyau.
“Insya Allah aku empu deka mai peminta ngaga begunan sekula baru SK Haji Bujang ngena agih belanja ari Menteri Besai.
“Ungkup sekula repuk, SMK Sebuyau ti ngembuan urung 1,000 nembiak, aku deka mai peminta tiu ngagai Menteri Pelajar ba aum menteri Hari Lima minggu baru.
“Aku deka ngaga peminta tang enti nadai sebarang agih belanja, kitai deka ransing nyendia agih belanja tu sereta meseti bisi agih belanja,” ku iya nyemetak.
