KUCHING: Perintah Sarawak seruran ransing ngelati pemansang pelajar nengah geran penyampau RM10 juta ngagai Sekula Sekondari Peribit China (ICSS) di nengeri tu.
Agih belanja nya udah disua Premier Sarawak, Datuk Patinggi Tan Sri Abang Johari Tun Openg serimbai penemuai basa deligit Serakup Kaunsil Pengatur Sekula Sekondari Peribit China Begempung Sarawak di Kompleks Satria Pertiwi, ditu kemari.
Ngetuai ke diligit nya Chairman Serakup, Temenggong Datuk Vincent Lau Lee Ming disempulang Sapit Chairman, Datuk Seri Richard Wee Liang Chiat, Tukang Wang, Datuk Seri Song Tiing Seng sereta Penulung Sekretari Besai, Kuang Wei Hua.
Inisiatif nya ngayan polisi inklusif Perintah Sarawak ke seruran ngaku pangku pengawa semua pelajar dikena nempa modal mensia bisi kualiti sereta nyukung pemansang nengeri enggau menua.
Kenyau ari taun 2014, perintah nengeri seruran meri bantu ninting taun ngagai sekula nya, enggau penyampau semua bantu manggai RM102 juta ungkup timpuh 13 taun.
Agih belanja ti nambah ari RM3 juta ngagai RM10 juta setaun mega mantu ngelempung tating belanja raban pengatur sekula sereta nentuka pemansang institusyen pelajar nya seruran diadu.
Ba penemuai nya, raban serakup mega meri terima kasih ke sukung perintah nengeri ke dipeda nyadi penyungkak penyulut akademik sereta nempa graduet ke ulih besemekih.
Sukung nya mega seriris enggau chara Sarawak ke ngemeratka pelajar ti lurus nadai ngira nembiak, nyengkaum nengah Skim Pelajar Tinggi Pechuma Sarawak (FTES) ke meri pemaik ngagai beribu nembiak.
Naka suku keterubah 2026, sepenyampau 4,694 nembiak bulih pemaik ari skim nya, nyengkaum 94 nembiak ke ngembuan Sijil Peperiksaan Bersepadu (UEC) ari sekula sekondari peribit China ke dipelanja nampung belajar. – EDISI UKAS
