KANOWIT: Lebih RM123 juta udah diagih ungkup bejalaika pemansang rentayan jalai alun ti nyambung Skim Pengentap Baru (SPS) Ngungun nyentuk SPS Jagau kelimpah nambah akses mobiliti peranak dia.

Kaban Kunsil Nengeri (ADUN) Ngemah, Anyi Jana madah, pengawa bejalaika projek nya ngaul sekeda renggat nengah ejensi perintah bebida dikena nentuka tetiap komponen pemansang lanchar.

Iya madah, renggat keterubah ngaul jalai SPS Ngungun ke Nanga Bat sepanjai 4.3 kilometer (km) nengah Opis Menteri Pemansang Genturung Pendiau enggau Kandang Menua (KKDW) ti beungkus lebih RM37.79 juta lalu ditinda kena 25 Februari tu tadi.

“Projek tu enti nitih langgur udah berengkah dipejalai tang bisi sekeda penanggul teknikal ti patut diputar nyengkaum pekara mayar ari Opis Tanah enggau Survei ba timpuh dua bulan,” ku iya.

Anyi bejaku munyi nya rambau Program Hari Ruang Bilik Tuai Komuniti enggau Tuai Raban Bansa Ngemah Tengah enggau Ngemah Hilir ditu, empai lama.

Tampung iya, projek jalai Nanga Bat ke Nanga Pra sepanjai lapan km nengah Ejensi Pemansang Rajang Atas (URDA) ti beungkus RM86 juta diatu tembu 86 peratus.

Iya madah, renggat ketiga ari Nanga Pra ke Nanga Jagau disadang ditinda ba suku ketiga taun tu bepanggai ba langgur ditetap Opis Kereja Raya (JKR).

“Enti enda ulih dipejalai ba timpuh nya, kitai ngarap ulih dikeamat abis laun ba suku keterubah 2027,” ku iya.

Anyi madah, projek nya ngaul pengawa ngambi tanah tang semua isu bekaul naka diatu mujur diputar meruan.

Ba lansa sebaka, ku iya, siti da projek jalai sepanjai tujuh km ke Simpang Jagau deka ditinda enda lama da.

Ungkup inisiatif sementara, Perintah Sarawak deka ngambi jalai batang ti endang bisi lalu dikemanah ungkup guna sementara peranak seraya nganti projek jalai besai tembu.