KUCHING: Gerempung Orang Buta Malaysia (SBM) Pampang Sarawak sehari tu tadi nerima geran penyampau RM20,000 ba baruh geran Gerempung Volunteer Pengintu Pengelantang (PSK).
Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madahka keretas kereja SBM udah dikemendarka pengudah dipansik nitihka standard peminta opis menteri iya.
“Taja sida enda meda tang sida udah dulu nembuka keretas kereja ngulihka geran ari orang ti ulih meda.
“Tu pekara ti patut dipuji lalu tau nyadi teladan ngagai gerempung OKU tauka gerempung pengintu pengelantang ke bukai,” ku iya.
Fatimah bejaku munyi nya rambau Program Nyerahka Geran Gerempung Volunteer Pengintu Pengelantang ngagai SBM Pampang Sarawak di King Centre ditu, tadi.
Ku iya, SBM Pampang Sarawak mega beratika pekara pemun orang bukai dalam nyendiaka palan gawa ungkup bakih sida.
“Sida enda ngerunding diri empu aja tang mega nyendiaka pengawa puang ungkup raban OKU ke bukai.
“Kelimpah ari nya, semangat ngatika diri sereta ulah enda minta kasih raban tu mega chukup manah.
“Sida semina begunaka sukung ari kitai,” ku iya.
Tandu iya, geran PSK penyampau RM20,000 nya agih bantu bagi taun 2020 lalu deka meri pemaik ngagai raban SBM Pampang Sarawak nyengkaum 18 iku pedagang kedai urut orang buta.
Fatimah mega madahka, bagi taun 2017 nyentuk 2019 penyampau RM1.5 juta agih belanja ungkup Geran PSK disediaka ninting taun.
“Taja pia, agih geran tu ditambah ba taun 2020 ngagai RM3 juta sereta udah meri pemaik ngagai 212 PSK ba selampur Sarawak.
“Ungkup taun tu (2021) penyampau agih Geran PSK agi mengkang RM3 juta lalu semua pemita ari PSK deka diperunding sebedau dikemendarka nengah sebuah komiti,” ku iya.
Iya mega meransang semua gerempung tauka Gerempung Ukai Dikuasa Perintah (NGO) ti bejalaika pengawa pengintu pengelantang ngaga peminta geran PSK dalam ngemanahka program enggau akiviti sida.