KUCHING: Nengah Opis Pengintu enggau Pemansang Tanah (LCDA), Perintah Sarawak ngungkupka belanja sepenyampau RM213.35 juta ba taun 2027.
Premier Sarawak, Datuk Patinggi Tan Sri Abang Johari Tun Openg madah, agih belanja nya dikena bejalaika pengawa ngaga 1,410 unit rumah murah di nengeri tu.
Ku iya, projek nya nyengkaum pemansang mengeri baru, Skim Nangkir Genturung Pendiau (SPK), Palan Penumbuh Menua Pesisir enggau pemansang mengeri baru di Kuching, Samarahan, Betong, Sibu, Kapit, Miri enggau Lawas.
“Sekeda projek ti udah dikemendarka dipejalai dalam taun baru iya nya Projek Rumah Permata Spektra di Lundu penyampau RM15 juta, Spaoh Baru (RM12 juta), Tabuan Melayu, Kuching (RM11.7 juta) enggau SPK Sambir, Samarahan (RM10 juta).
“Projek bukai nyengkaum Projek Ngemansangka Baru Darul Hana, Kuching penyampau RM25 juta, Projek Pemansang Kemuyang, Sibu (RM20 juta), Pemansang Pasir Panjang, Kuching (RM15 juta), Kandang Mengeri Baru Sebuyau (RM18 juta) enggau SPK Long Tuan, Lawas (RM10 juta),” terang iya.
Abang Johari nerang pekara nya lebuh mantaika Bajet 2027 rambau Aum Kedua Penggal Kelima Kunsil Nengeri (DUN) Sarawak ba Kompleks DUN ditu tadi.
Ku iya, kelimpah projek ari LCDA, perintah mega udah ngungkupka RM106 juta ngagai Kaunsil Pemansang Pengawa Berumah (HDC) dikena bejalaika 10 projek fizikal.
