KUCHING: Bantu pekara wang khas sepenyampau RM25 juta dikena negap raban pedagang indu Sarawak diatu manggai ba renggat kepenudi.
Menteri Pemansang Indu, Nembiak Mit enggau Pengelantang Komuniti, Datuk Seri Fatimah Abdullah madah, jali khas nya dibantai Premier Sarawak, Datuk Patinggi Tan Sri Abang Johari Tun Openg ba taun nyin kemari.
Iya madah, diatu kitai benung ngelanggur atur jali khas nya ti siru ke raban indu ngambi raban diselinting amat bulih pemaik.
“Kami benung berandau enggau Affin Bank ba pengawa nimbang tikas bungai jali ti ditaga.
“Taja pia, pekara pemadu beguna iya nya kitai deka nentu jali tu enda nating raban indu ti minta jali tu.
“Nya alai, bantu pekara wang tu siti inisiatif ti besai reti dikena mantu mayuh agi pedagang indu kitai nambah penatai pemisi sida ngagai tikas ti tinggi agi,” ku iya.
Fatimah mansutka jaku nya rambau Program Ngintu Hari Indu Antarabansa (IWD) 2025 di Hotel Imperial ditu, sehari tu.
Iya madah, bantu pekara wang khas nya dikena nambah bantu pekara wang ti endang bisi ari Opis Ruang Bilik enggau Indu Sarawak (JWKS) iya nya geran sekali bayar sepenyampau RM500 enggau RM2,000 ngagai indu ba kategori B40 sereta sida ti baru deka ngepun dagang.
“RM500 engka siti penyampau ti mit tang tu ulih mantu pedagang indu meli perengka dikena ngepun dagang.
“Kami ngeleda bisi raban indu ti udah mujur sereta begunaka bantu belanja ti besai agi tauka jali dikena ngerembai dagang sida.
“Nya alai, bantu pekara wang khas nengah jali tu disadang ulih meri empas ti besai agi ngagai raban tu,” terang iya.
