KUCHING: Perintah Sarawak ngagihka RM27.12 juta belanja ungkup bejalaika mayuh bengkah projek sosioekonomi di Pelilih Song di baruh Langgur Pemansang Malaysia Lumpar Ke-12 (RMK-12).
Menteri Pemansang Indu, Nembiak Mit enggau Pengelantang Komuniti, Datuk Seri Fatimah Abdullah madah, nya mungkur RM24.9 juta belanja ungkup bejalaika 116 bengkah Program Transformasyen Menua Pesisir (RTP).
Ku iya, pia mega RM1 juta belanja ungkup bejalaika 129 projek di baruh Program Nyeruri Rumah Rayat Seranta Sarawak (PPRMS).
“Penyampau RM1.22 juta belanja udah diagihka ungkup pemansang sosioekonomi di baruh Ejensi Pemansang Ulu Rajang (URDA) nyengkaum program dagang, program pemansang orang berikan, latih penau enggau program sukung komuniti ruang bilik seranta.
“Kelimpah ari nya, bantu khas mega bisi diberi ngagai raban orang kurang penatai pemisi ba renggat mikro di Pelilih Song,” ku iya.
Fatimah bejaku munyi nya lebuh nyaut tanya Kaban Kunsil Nengeri (ADUN) Katibas Lidam Assan bekaul Pelilih Song ti dituku nyadi pelilih menua pemadu seranta nitihka data ba ripot Department of Statistics Malaysia (DOSM) 2020 rambau Aum DUN Sarawak Ke-19 di DUN Sarawak ditu, kemari.
Ku iya, dikena mutarka isu penyeranta kelebih agi di menua pesisir, perengkaguna nyengkaum pengawa nyendiaka infrastruktur enggau utiliti pemun, akses, servis pengerai, pelajar enggau pengawa berumah mega bisi disediaka.
“Naka March 2024, 739 iku ari ruang bilik seranta nerima bantu belanja ninting bulan ari Opis Pengintu Pengelantang Mensia Mayuh (JKM) dibaruh skim nya.
“Sekeda ari sida tu iya nya Bantu Orang Tuai (BWE) penyampau RM500 sebulan, Bantu Anak Mit penyampau RM150 nyentuk RM1,000 sebulan enggau Bantu Am (BA) penyampau RM200 nyentuk RM300 sebulan sereta bantu bukai,” ku iya.
