Dorsica Robert dulu suba kala popular enggau lagu Enda Nyagi Jadi ti dirikod enggau kompeni Syarikat Irama. Taja pia, populariti lagu nya enda ulih ngetanka iya lama ba industri tegal pengiruh enggau pengawa rumahtangga.
Dalam kandang lima taun sebedau tu, bala artis kitai bedau tentu mayuh peluang merindang ba panggau tauka pengawa merindang baka diatu.
Populariti lagu baru maya nya mayuh agi bepanggai ba radio. Diatu artis kitai chukup benasit laban ninting minggu bisi pengawa merindang lalu lagu sida ulih didinga nengah mayuh media sosial.
Betemu baru kitai ba segmen pemerindang tu ke alai kitai bekunsika cherita enggau berita ari Dorsica Robert. Iya maya tu chukup kisuk kin kitu enggau pengawa merindang iya di serata Sarawak enggau di Semenanjung Malaysia.
Iya nyau majak kiruh enggau penatai album baru; album solo iya ti ketiga pengudah lima taun enda ngeluarkan album.
Album Semampai Ba Ati
Album Kediri Semampai Ba Ati ngundan tujuh iti lagu. Tujuh iti lagu nya bisi tiga iti batang rentak iya nya cha cha, balada enggau kerunchung. Kelimpah ari lagu Kediri, Enggai Dikeduan, Redak Ati Ku, Enda Matak Jaku, Aya Lelang enggau Berai.
Entara tujuh iti lagu, Semampai Ba Ati enggau Kediri tau dikumbai lagu hits laban dipasang ba radio nyau ka ninting hari.
“Aku beterima kasih ngagai semua DJ radio Catsfm enggau Waifm ti enda nemu leju masang lagu aku. Ba aku bala DJ / pengeluar program megai tanggungpengawa ti chukup beguna laban sida mih ti nentu sekalika lagu nya didinga ba radio tauka enda”, ku Dorsica bekunsika penemu diri.
Dulu suba Dorsica ngeluarka album iya ti keterubah begulai enggau Syarikat Irama di Sibu. Ba album iya ti ketiga tu Dorsica begulai Twin Tone Production.
Twin Tone Production nya siti kompeni ke benung chakah nyerumba kompeni rikod ke bukai.
“Aku beterima kasih mayuh enggau Mr Allen Nyuntai ke udah nerima aku nyadi artis Twin Tone Production. Terima kasih mega komposer enggau pemuzik aku ke nyengkaum Lesry Luyoh, David Till, Allen Nyuntai, Wilsit Risit enggau aku empu mega.
Aku mega enggai enda meri terima kasih ngagai artis Twin Tone Production ke bukai laban meri kerejasama ti chukup badas. Enti jaku kemayahari tu sida dikumbai kitai “spotting”, Dorsica sekali agi madahka pengaga ati iya enggau album baru ke diatu benung dijual di serata Sarawak.
Berita penuh ulih dipeda ba surat kabar Suara Sarawak pagila (14 Julai 2019).
