SIBU: Chairman Parti Sa’ati Rayat Sarawak (SUPP) Pampang Dudong, Wong Ching Yong keran mantu peranak Rumah Anggau Minggat, Sungai Pasai Siong Tengah.
Lebuh ngabas rumah panjai ba sitak ulu Kunsil Nengeri (Dun) Dudong, iya enggau bala bukai udah nengah jalai mit ti luchak urung lapan kilometer penyauh ari jalai besai Batu 16, Jalai Oya.
“Rumah Anggau nya entara rumah panjai pemadu ulu ba sitak Dun Dudong.
“Kami nengah jalai luchak pengelama 25 minit sebedau ngenataika diri.
“Rumah panjai tu mega nadai disikap bekal kuasa karan enggau bekal ai beresi.
“Nya kebuah, aku keran mantu sida ngulihka perengkaguna pemun tu sereta bantu bukai,” terang iya, Hari Minggu tu tadi.
Wong madahka diri udah nganjung peminta dalam bulan nyin kemari ngagai Menteri Utiliti Dato Sri Dr Stephen Rundi Utom ungkup bantu Skim Bekal Kuasa Karan Menua Pesisir (RES).
“Anggau madahka Sarawak Energy Berhad (SEB) Sibu udah ngabas rumah panjai nya beberapa hari ke udah lalu sida ngarapka RES ulih nyikap perengkaguna pemun ba rumah panjai tu.
“Pia mega, iya bisi minta baru aku ngulih pinjau ti bisi disedia ungkup rumah panjai di baruh bidang kuasa Opis Menteri Pengawa Berumah ngambi ngentak rumah panjai baru.
“Kami udah ngabas taba tanah ti diperambu peranak Rumah Anggau endur ngentak rumah panjai baru.
“Aku besemaya deka mantu sida ngulih bantu pinjau nya ari Menteri Kaunsil Kandang Menua enggau Pengawa Berumah Datuk Sri Dr Sim Kui Hian,” terang iya.
