BINTANGOR: Sebuah rumah di Sungai Enchawit, Julau ditu, nyauka angus urung pukul 1.27 ngalihari tadi.
Ketuai Opis Bomba enggau Penyah Penusah Bintangor, Nicholas Belulin madahka orang bempu rumah sedarka penusah nya pengudah nerima kangau orang berimbai pendiau ti meda sebun datai ari dapur rumah nya.
“Iya udah nya mabak pintu rumah nya lalu mujur ngerara api ngena perengka pengerara api sebedau Tim Bomba Volunteer (PBS) Julai datai ngesah kia,” ku iya lebuh dirandau pemberita.
Kenu ku iya, pengempu rumah dipelaba enda ingat madamka dapur gis lebuh nyumai asi ukui iya sebedau mindah.
Ku iya, nasip amat penusah nya jampat ditemu orang diau besemak ti sikar nyelamat rumah ari angus.
“Raban ari Opis Bomba Bintangor berumban ngesah ngagai endur penusah nyadi pengudah nerima kangau ngenyit urung pukul 1.27 ngalihari.
“Lebuh datai dia, api udah dirara tang kitai meresa enggau minta penerang pasal penusah nya ari pengempu rumah.
“Pengudah nentuka rumah likun, kami mulaika diri ke opis. Nya alai aku meri terima kasih ngagai lima kaban PBS Julau ti bela datai ngesah,” ku iya.
Berebak enggau nya, Nicholas ngelalau mensia mayuh meresa dulu pengelikun di rumah sebedau sida mindah.
“Tentuka api gis di dapur udah dipadam pengudah tembu berapi ngambika semua likun lalu ulih nyeliah sebarang penusah angus nyadi.
“Sebedau mupuk ke opis, raban bomba mega limpang meresa tiga unit pili bomba ba sepanjai Jalai Rumah Meling lalu semua agi manah,” terang iya.
