Rumah panjai Kenyah di Long Palai angus

MIRI: Sebuah rumah panjai enam pintu di Long Palai angus pagi kemari.

Pemesai Operasyen Ketuai Balai Bomba Marudi PPgB Maureen Sim Ah Lian madah sida nerima kangau telefon ari Kepala Pengajar Sekula Primari (SK) Long Palai urung jam 5.20 pagi kemari.

“Lebuh kangau diterima nadai bisi kes bebadi nyawa diripotka.

“Sebuah blok rumah panjai bansa Kenyah ti ngembuan enam pintu diripotka angus,” ku iya.

Sim madah pekara nya ba siti penerang media lebuh ngetuai operasyen nyelamat kemari.

Ku iya, bisi 20 iku ruang bilik diau ba rumah panjai ti angus nya.

“Diatu agi bedau bulih penerang ti nyemetak laban bisi penanggul ba komunikasyen entara piak Bomba enggau bala peranak rumah panjai nya.

“Piak Bomba deka berangkat nuju ngagai palan ti angus ngena Unit ‘Udara’ dalam pejalai nuju ngagai Mulu,” ku iya.

Ku penerang Sim, penyauh palan angus nya urung tujuh ke lapan jam pejalai laban ngena jalai balak.

Sebedau tu, penusah angus ba Long Palai kala nyadi ba taun 2017 ti nganguska 11 buah pintu rumah panjai urung jam 2.30 pagi.

Suara Sarawak