BINTULU: Sepuluh pintu bilik ngaul 88 peranak Rumah Panjai Elwin Ugan, Sungai Binyo, Sebauh ditu semina tinggal gari ba punggung pengudah rumah panjai sida angus lengis urung pukul 1.18 dini hari tadi.
Tuai Rumah Elwin Ugan madah, nadai siku sida serumah bisi ba rumah lebuh penusah nyadi laban gawa ba mengeri baka di Bintulu enggau kandang menua bukai.
Iya semina nerima berita pasal penusah nya ari peranak ke diau besemak rumah panjai sida ti begau tepedaka sebun tebal.
Ku iya, pun penusah enggau penyampau pengerugi ditapi sida serumah agi dipansik piak bomba.
Ba lansa sama, Ketuai Polis Pelilih Bintulu, Superintenden Zulkipli Suhaili ngenukuka Opis Mit Polis Sebauh bisi nerima ripot ari Tuai Rumah Elwin pasal penusah angus tu pukul 9.03 pagi tadi.
