RUU baka ‘kerubung telu’ – Idris

Utai ke dipantai dalam isi RUU nya nadai mai penguntung ngagai rayat menua tu

KUCHING: Kami enda mudah deka nyukung ubah ba Rang Undang-Undang (RUU) Konstitusyen Malaysia, ku Ketuai Infomasyen Parti Pesaka Bersatu Bumiputera (PBB) Sarawak Datuk Idris Buang
Idris madah utai ke dipantai dalam isi RUU nya mayuh ‘lubang’ sereta nadai mai penguntung ngagai rayat menua Sarawak enggau Sabah.

“Ni bagi jaku ti madahka Sarawak enggau Sabah deka diberi sama rata tauka bekunsi nitihka MA63? Ni bagi jaku ti madahka ubah nya mai pemanah ngagai dua bengkah menua tu?

“Padah ngagai ketuai Pakatan Harapan (PH), anang semina deka nyelamatka diri, saut ngagai tanya nya tetap sama iya nya nadai!” ku Idris madah ngagai raban Suara Sarawak nengah penerang berita ti nimbal Chairman PH enggau Parti Tindakan Demokratik (DAP).

Iya madah RUU tu nadai mai ubah ngagai nama-nama, semina dikena nyaru sempama baka telu manuk dikumbai burak isi tang kerubung aja.

Datuk Idris Buang

“Chong patut meda baru ngagai rintai dipantaika Kepala Menteri Datuk Patinggi Abang Johari enggau Delegasi Perintah Sarawak ba Komiti Pemandu.

“Pekara ti bisi dalam rintai nya nyengkaum semua pekara ti patut disaut Perintah Besai enggau ati ti bendar sereta lurus,” ku iya.

Seraya nya Idris madah perambu ngaga ubah ba Rang Undang-Undang Perkara 1(2) Kontitusyen Malaysia enda profesional sereta enda nyemetak.

Apin lama ti udah, Chairman PH Sarawak Chong Chieng Jen minta Kaban Parlimen Gabungan Parti Sarawak (GPS) nyukung pengawa macha kali kedua ubah ba RUU Konstitusyen Malaysia ba Aum Kaunsil Nengeri.

Chong minta tiap pengari rayat ari GPS sereta kaban penyakal ke bukai enda berundingka laya politik sida tang berundingka pemanah deka dibai ari ubah nya.