KUCHING: Rang Undang-Undang (RUU) Kaunsil Kraf Sarawak (MKS), 2023 dikemendar ba Aum Kunsil Nengeri (DUN), kemari.

RUU nya dikemendar pengudah dibacha Menteri Dagang Temuai, Seni, Datuk Seri Abdul Karim Rahman Hamzah ti mega Kaban Kaunsil Nengeri (ADUN) Asajaya ketiga kali lalu disukung 19 ADUN bukai.

Ku iya, tuju penumbuh MKS nya nyadi sebagi ari entiti raban ti bekuasa ti beempu tanggungpengawa nyaga enggau ngemansangka kraf ba menua tu.

Karim madah, RUU nya beguna amat ngambi industri kraf Sarawak dikemansang, ulih besemekih enggau rembus makit antarabansa.

“Nengah RUU tu, kami pechaya tu mantu nyungkak ekonomi rama laban ngembuan penyelai enggau pemanah ngagai Kraf Jari Malaysia.

“Pengawa tu mega meri perati ba pekara besai sereta juluk nyungkak industri kraf Sarawak,” ku iya.

Karim mansutka jaku nya ba aum pemberita pengudah RUU MKS 2023 dibacha ketiga kali lebuh Aum Keterubah Penggal Kedua DUN Sarawak Ke-19, ditu kemari.

Ku iya, industri kraf beguna laban ulih nambahka penatai pemisi menua kelebih agi ngagai rayat ba menua pesisir.

“Nipak industri dagang temuai kitai ti majak nambah, kraf tu produk ti besai reti laban ngayanka penyelai Sarawak ti diuan pupu bansa.

“Pia mega, genap raban bansa bisi penyelai kediri empu ti ulih matak perati.

Tu nyengkaum adat asal, pemakai, pekayan enggau gaya idup.

“Pengelebih tu meseti dikena enggau dikemansang.

Aku ngasai nya meri empas manah lalu dudi hari engka produk tebilang dunya baka Gucci, Prada, Hermes deka milih kraf Borneo,” ku iya.

Iya madah baru, MKS deka ditumbuh enda lama agi laban Sarawak udah bisi langkar pengawa semina nganti atur bukai baka ari sukut belanja.

Ungkup rikod, penumbuh 1997 MKS ngerikod kurang ari 300 iku ke udah nganjung nama nyadi kaban tang ba taun 2019 bisi 950 iku mujur rejister diri.