SIBU: Leka sabak ngiring pengawa nganjung niang Konstabel Nicholester Dadup Unggat ari rumah aki iya, Salang Kaya di Sibu Jaya nuju Pendam Nirvana, Jalai Sibu-Bintulu, ditu pagi tadi.

Raban Polis DiRaja Malaysia (PDRM) udah begelumu ba rumah Salang ngambi mai niang ti deka ditumbak ba Pendam Nirvana.

Niang dibai pansut ari rumah apai iya urung pukul 6 pagi ngena adat enggau atur penuh polis.

Sabak sinu ari bala niang sebilik, kaban belayan sereta bala bakih iya ti udah ngenataika diri dia magang ngambi sama ngiring niang ngagai pendam Nirvana nya.

Raban PDRM ti ngena lebih ari 10 buah motosikal besai polis trafik, entukar polis enggau bepuluh iku polis udah nguluka pengawa nganjung niang Dadup.

Udah nya, semua sida nya ngiring niang nuju Pendam Nirvana Sibu ngambika niang ditumbak ngena adat penuh polis.

Sama datai ba penusah tu iya nya Ketuai Polis Pelilih Sibu ACP Stanley Jonathan Ringgit sereta pemesai kanan polis ke bukai.