KUCHING: Kapasiti semua arus telekomunikasyen Sarawak deka nambah lebih empat kali lipat ari 1.6 terabit sesikin (Tbps) ngagai 7.2 Tbps nengah program rentayan SACOFA moden ke beungkus RM185 juta.
Menteri Utiliti enggau Telekomunikasyen Sarawak, Datuk Sri Julaihi Narawi madah, program nya udah berengkah November 2025 lalu disadang ulih tembu 2027, ti nyadi chara ngenegapka infrastruktur telekomunikasyen nengeri dikena nipak guna bekaul servis digital.
Ku iya, pemansang teknologi baka Pemintar Digaga (AI), Cloud Computing, Internet Of Things (IoT), Mengeri Pintar enggau Servis Digital Moden begunaka arus telekomunikasyen ke laju agi, puh sereta ngembuan kapasiti besai.
“Ubah tu begunaka lebih ari semina nyungkak produktiviti.
Tu begunaka pemansang rentayan telekomunikasyen ke moden, puh sereta ngembuan kapasiti ke besai agi ke ulih nipak guna ekonomi digital ke majak mansang sereta nentuka Sarawak meruan ulih besemekih ba jeman dunya nadai betakah,” ku iya.
Julaihi bejaku munyi nya maya Pengerami Makai Lemai Ngintu Genap Taun Penumbuh SACOFA Ke-25, di kuching, malam kemari ti dipenyadika Premier Sarawak, Datuk Patinggi Tan Sri Abang Johari Tun Openg.
Iya mega madah, program nya deka ngena teknologi Optical Transport Network (OTN) enggau penyikar arus bepelasarka AI dikena nyungkakka kapasiti enggau pengepuh rentayan arus penyambung.
Kelimpah ari nya, ku iya, kapasiti ba tiap bengkah palan deka ditambah ari 10 gigabit sesikin (Gbps) ngagai 100 Gbps.
“Tu deka nyungkakka agi pengulih arus penyambung ke dikena ba pengawa dagang, servis perintah enggau komuniti selampur Sarawak,” ku iya madah baru.
Julaihi ti mega Chairman SACOFA madah, naka Julai 2026, bisi 365 palan tauka urung 50 peratus ari semua 732 palan udah tembu lalu sedia deka dikena kelimpah 367 iti palan benung digaga moden agi.-EDISI UKAS
