KUCHING: Program Sitak Pemansang Sri Aman (Sada) dikeandal ulih bejalaika pangku pengawa enggau manah ngambi ngelengkas agi pemansang Bagi Menua Sri Aman dudi hari.
Pekara tu mega deka mantu Perintah Sarawak ngambi berundingka inisiatif pemadu manah ngemansangka sektor pemansang ke patut nitihka pengulih dia.
Dulu ari tu sebengkah aum ngelanggur penumbuh komiti iya mujur diatur ba Bilik Aum Opis Sekretari Perintah Sarawak di Wisma Bapa Malaysia, kena Hari Satu tu tadi.
Aum tu diuluka Sekretari Perintah Nengeri, Datuk Amar Jaul Samion lalu sama datai Chairperson Sada Datuk Seri Rohani Abdul Karim ti mega Kaban Parlimen Batang Lupar.
Sama datai, Menteri Muda Pengawa Dagang Entarabansa enggau Industri, Terminal Industri enggau Pemansang Orang Dagang Datuk Malcom Mussen Lamoh (Adun Batang Ai), Menteri Muda Nembiak enggau Lumba Datuk Snowdan Lawan (Adun Balai Ringin), Adun Bukit Begunan Datuk Mong Dagang, Residen Bagi Menua Sri Aman Indit Bangai, Pemesai Pelilih Sri Aman Mohd Ashree Wee sereta pemesai tinggi perintah ari Bagi Menua Sri Aman.
Sekeda pengari ari ejensi perintah mega bisi datai baka Opis Tanah enggau Survey (JTS), Opis Bekal Ai Menua Pesisir (JBALB), Opis Betanam Betupi, Opis Kereja Raya(JKR) sereta Piak Kaunsil Kandang Menua (PBT).
Kepala Menteri Datuk Patinggi Abang Johari Tun Openg madanka penumbuh SADA kena 19 Januari tu tadi.
Tu deka ngelanggur projek pemansang infrastruktur, ekonomi, pengawa betanam betupi sereta dagang temuai ba Bagi Menua Sri Aman tu.
