Sainstis rampa menua dianjung sehari tu

KUCHING: Kepala Menteri Datuk Patinggi Abang Johari Tun Openg kemari meri basa kepenudi ngagai niang Datuk Sri James Dawos Mamit ba rumah niang di Taman Stutong Indah.

Penatai Kepala Menteri urung pukul 12.15 tengahari mega ngenataika penyinu ati ngagai bini niang, Datin Seri Christine Dawung Narub.

Sama nyempulang Kepala Menteri iya nya sapit iya, Datuk Amar Douglas Uggah Embas enggau Datuk Amar Awang Tengah Ali Hasan sereta Menteri Kuansil Kandang Menua enggau Pengawa Berumah Datuk Dr. Sim Kui Hian.

Sida ngelimpangka awak urung 15 minit meri basa kepenudi ngagai niang Dawos enggau ati sinu laban berasai amat puang ditinggalka siku pemesai menua ti chukup bejasa midang.

Sama datai meri basa kepenudi Menteri Pelajar, Sains enggau Pandik Teknologi, Datuk Sri Micheal Manyin Jawong.

BASA KEPENUDI… Datuk Patinggi Abang Johari Tun Openg bersama Datuk Amar Douglas Uggah Embas, Datuk Amar Awang Tengah Ali Hasan enggau Datuk Dr. Sim Kui Hian meri basa kepenudi ngagai niang Datuk Sri James Dawos Mamit ba Taman Stutong Indah di Kuching kemari.

Chairman Kaunsil Kandang Menua Kota Samarahan Datuk Peter Minos lebuh meri basa kepenudi ensanus madahka mayuh ubah pemansang dibai niang ungkup sitak nya lebuh nyadi pengari rayat dia.

Diatu mayuh rumah disikap enggau disambung bekal ai, kuasa karan enggau jalai alun sepanjai empat penggal niang nyadi kaban parlimen lalu niang tu orang liat ati berengkah ari sekula primari lalu ari pengeran iya mujur nampung pelajar dataika tikas tinggi, ku Minos ngasaika diri lenyau bakih ba politik.

Minos mega ngarapka rayat kelebih agi raban bansa Bidayuh deka seruran ingatka jasa enggau bantu niang ngagai sida.

Niang Dawos kala mangku pengawa nyadi Sapit Menteri Kuasa, Teknologi Gadung enggau Ai madamka seput lebuh tinduk ba rumah iya empu di Taman Stutong Indah ditu urung pukul 11.30 malam Hari Satu tu tadi.

Niang midang ketegal lempuang, mata enggau pending kena rampit kuman bepun ari penyakit riman idung ti nepan tudah kenyau ari beberapa taun ke udah.

Penyakit niang majak raya kenyau ari April tu tadi pengudah enda dapat nelan laban lemi gumpal isi ba rekung.

Niang midang manggai umur 71 taun lalu ninggalka siku balu, tiga anak lelaki enggau tujuh uchu.

Niang Dawos nyadi ex-Kaban Parlimen Puncak Borneo pengelama empat penggal lalu kala dipadu nyadi Sapit Menteri Dagang Temuai kena 14 Disember 2009, sebedau dipadu nyadi Sapit Menteri Pengeraja Asal enggau Rampa Menua pengudah menang ba Pengawa Bepilih Besai ke-13 kena 16 Mei 2013.

Saintis rampa menua mungkal pejalai politik diri lebuh bediri minta pilih Parlimen di baruh tikit Parti Pesaka Bumiputera Bersatu (PBB) ngarika Barisan Nasional (BN) lalu keterubah menang penuduk Parlimen Mambong taun 1999 ti diatu dikumbai Parlimen Puncak Borneo.

Niang nyurutka diri ari politik beberapa bulan sebedau pengawa bepilih besai nyin tadi ketegal bepenanggul ba pengerai lalu meri awak ngagai pengari bukai nampung pengawa iya.

Niang Dawos dipelaba deka disembiang ba Gerija St Ann, Batu 10 urung pukul 10 sehari tu lalu ditumbak ba pendam Kampung Stabut, Padawan, menua asal niang empu.