BINTULU: Siku nembiak lelaki bebadi nyawa pengudah motosikal iya dilantak entukar bukai ba KM 14 Jalai Tatau- Bintulu, semak ditu, lemai Hari Dua tu tadi.

Ba penusah ke nyadi urung pukul 5.20 lemai nya, niang Ajai Merapoh, 27 taun, ari Rumah Kilut, Sungai Selitut, Jalai Tatau- Bintulu parai tekala nya ba endur penusah nyadi.

Kepala Polis Pelilih Tatau, DSP Dennis Bunyam, madah, penusah dipelaba bepun ari deriba entukar 4WD bansa Ford Ranger datai ari Tatau ngagai Bintulu ngenyit tama ngagai jalai sepiak lalu ngelantak motosikal niang ari mua.

Niang enggau motosikal tudah lalu tepelanting ke tisi jalai lalu niang ditukuka bala staf perubat Klinik Pengerai Tatau parai dia laban balat bakal ba pala.

Deriba entukar 4WD dipelaba ngelarika diri ngagai Bintulu seraya bangkai niang dianjung ke Sepital Bintulu ngambika dipansik.

Saksi tauka mensia mayuh ke meda penusah tu nyadi dipinta mantu pansik enggau telefon ngagai Pemesai Pansik Bagi Pengawa Mansik enggau Penerit Adat Trafik Indu Opis Polis Pelilih Tatau, Inspektor Lim Tzer Feng ba lumur 013-999698.