KUCHING: Peranak Sarawak ke apin nerima tuchuk vaksin diatu ulih datai terus ngambi nerima vaksin ba tiap Palan Meri Vaksin (PPV) ba selampur menua.
Penyanding Penemu Komiti Penyangga Penusah Nengeri (JPBN), Datuk Seri Dr Sim Kui Hian madah, semaya nadai agi dikena ungkup rayat ba menua tu nerima vaksin.
“Nya alai, kita dipinta datai ngagai PPV ba Sarawak ngambi betuchuk vaksin,” ku iya nerang, ditu kemari.
Menteri Kaunsil Kandang Menua enggau Pengawa Berumah nya nyemetak madah, mensia mayuh deka napi penanggul mindah ke bukai enti enda betuchuk vaksin.
“Palan ke suah ditemu bisi kes Covid-19 baka kedai makai, tamu, palan bebelika barang enggau ke bukai ke alai semina sida ke udah nerima vaksin aja dikemendar tama,” terang iya.
Ku Kui Hian, mensia mayuh mesti nerima vaksin laban nya beguna amat dikena nyaga pengerai diri laban kes pemati ketegal Covid-19 dipeda kurang kenyau ari pengawa betuchuk vaksin dipejalai di Sarawak.
Iya madah, tu nyengkaum kes berampit kategori 5 (intubasi enggau ventilasi), kategori 4 (begunaka oksigen) enggau kategori 3 (simptom enggau x-Ray).
