SARATOK: Serakup Pekebun Rian Musang King patut ditumbuh ditu ngambi bisi komiti gawa nyaga enggau ngintu pengelantang bala pekebun.
Sapit Menteri Pengeluar Kuasa enggau Pengeraja Asal, Ali Biju madah, pemisi serakup tu ila deka nyadi pelasar bekunsika penemu, pengelandik enggau penerang bekaul rian Musang King.
Ku iya, genap pengawa dikereja kitai chara bedandang besai baka Musang King tu endang begunaka pelasar ti tegap, ti ulih mai sada kitai nyarih agi didinga.
“Pulai ngagai program nanam rian Musang King tu, aku ngarapka kitai di Saratok ditu bisi serakup tauka gerempung ti ulih ngempung bala pekebun ngaul mayuh macham pengawa bekaul.
“Ambika chunto bala pekebun ba Nanga Ibus di Mudong, Jaong Awik, Semambu Kabo di Kawit enggau Tembawai Kapok din mega ulih begempung di baruh siti perabung, besaup ngemansangka utai tanam bisi rega komersial tu,” ku iya.
Ali mansutka jaku tu lebuh berandau betunga begulai enggau bala pekebun Projek Pemungkal Nanam Rian Musang King ba Kelumpok Kawit betuaika Desmond Jemeni ditu, ensana.
Iya madah, pemujur projek pemungkal tu ila bepanggai ba pengepuh enggau pengeransing bala pekebun nya empu belajarka chara nanam enggau ngintu pun rian nyentuk bebuah kandang empat ngagai tujuh taun deka datai.
“Enti bisi serakup, kitai ulih begulai enggau pangan diri, berandauka chara ngintu, kitai begunaka pelasar baka tu.
“Serakup tu manah amat awakka kitai nyamai diputar enti sema bisi sebarang penanggul jemah. Sitak Krian mega bisi nganjung peminta projek ke sebaka.
“Reti iya, majak mayuh kitai ditu nyau sedarka pengulih besai rian Musang King ari sukut rega enggau peminta makit rembus ngagai menua luar baka China enggau Hong Kong.
“Kitai beterima kasih ngagai Direktor Sitak Pemansang Betanam Betupi (IADA) Kalaka Saribas Betong, Tedung Bugak ti udah mansutka penemu manah baka tu,” ku Ali.
Ungkup penerang, 400 hektar dandang tanah mujur ditanam rian Musang King enggau Black Ton ti nyadi projek pemungkal ba Saratok lalu diatu mansang besai sereta galak.
Rambau pejalai nya mega, Ali enggau bala bukai diuluka Desmond bejalai ngabas kandang ngelingi kebun rian bedandang besai nya.
“Manah amat enti endur tu dikemansang nyadi palan endur nemuai, tau mega didirika endur diau bemalam baka chalet baka kitai numbuhka palan dagang temuai dalam kebun.
“Bala temuai datai ari menua luar kelebih agi ari menua China enggau Hong Kong sigi rindu nemuai ngagai kebun seraya nimpai pemanah rampa menua enggau pengelebat buah rian.
“Tu siti pemansut ekonomi pekebun ti patut diperunding laban aku meda pengulih kebun tu diangkat nyadi eko dagang temuai,” ku Ali merambu.
