KUCHING: Sarawak agi beguna mayuh pengereja pengawa tauka staf ngintu pengerai dalam meri servis pengerai ti meruan ngagai rayat di menua tu.
Direktor Sepital Besai Sarawak (HUS) Dr. Ngian Hie Ung madahka sektor pengerai di Sarawak beguna mayuh agi raban pengereja pengawa ukai semina raban lutur aja tang ba mayuh bengka bidang bukai enggau servis.
“Ukai semina beguna lutur aja, tang ba bidang enggau servis bukai baka fisio, optometrik enggau ke bukai, nyengkaum raban injinir.
“Aku ngarapka bala nembiak ti datai ulih ngelala peluang pengawa ti dikerindu sereta ngaga pemutus deka nyereta kami (nyadi pengereja pengawa ba sepital) ba jeman ti deka datai,” ku iya.
Hie Ung bejaku munyi nya Hari Ngelalu Temuai HUS di Auditorium CRC HUS ditu tadi.
Ku iya, siti ari tuju sida ngatur program hari ngelalu temuai ngagai HUS endang deka mantai sereta mandang ngagai mensia mayuh pasal sepital sereta servis ti bisi disedia nyengkaum kereban ti diguna.
