KUCHING: Sarawak deka mangku pengawa nyaup ngemujur juluk Malaysia nyadi bakih strategik besai di ASEAN nengah pemansang sektor kuasa gadung, semikonduktor enggau kilang teknologi tinggi.
Premier Sarawak, Datuk Patinggi Tan Sri Abang Johari Tun Openg madah, nengeri tu diatu ba penuduk ti strategik matak pengawa meranak puku ba ekonomi baru bepelasarka pemeruan rampa menua lalu nyukung inisiatif ngentapka penuduk Malaysia ba renggat serantau.
“Sarawak ulih nampung inisiatif ngemansang ekonomi baru ti bepuguka kuasa gadung enggau pemeruan rampa menua kelimpah nempa industri kilang pemadu maju sekali ke ba sektor semikonduktor tauka kuasa beresi.
“Insya-Allah, kitai ulih ngangkatka Malaysia nyadi siti palan strategik di rantau ASEAN lalu engka nyadi pemekal kuasa ngagai bakih di ASEAN baka ti dikedeka Menteri Besai, Datuk Seri Anwar Ibrahim,” ku iya.
Abang Johari nibar jaku nya ba Pengerami Makai Lemai Gawai Dayak Renggat Sarawak 2026 di Palan Konvensyen Borneo Kuching (BCCK), ditu malam kemari.
Ba pekara sama, iya mega meri terima kasih ngagai Perintah Besai laban udah mulaika Penyangkai Kapal Bintulu ngagai Sarawak ti dipeda nyadi siti inisiatif beguna negap penuduk ekonomi nengeri.
“Menteri Besai mega madah ke Bintulu udah diaku World Economic Forum nyadi siti ari 30 Transitional Industrial Clusters di dunya lalu Sarawak temegah dipasuk ba rintai nya.
“Pengawa ngaku tu negap penuduk Sarawak nyadi palan meranak puku ti besemekih ba renggat antarabansa nengah inisiatif ngemansang ekonomi baru ti bepuguka kuasa gadung enggau pemeruan rampa menua,” ku iya.
Terang iya, Sarawak ulih ngemansang sektor kilang teknologi tinggi nyengkaum ba industri semikonduktor enggau kuasa beresi seraya ngangkatka kandang menua tu nyadi pemekuh besai ba landskap ekonomi dudi hari.
Berebak enggau nya, iya ngarap ke Perintah Besai ulih berati ke insentif tambah dikena meransang pengawa meranak puku ba ekonomi baru kelebih agi ba industri hidrogen enggau semikonduktor ti bisi pengulih mansutka untung besai ngagai menua dudi hari.
Kelimpah ari nya, Abang Johari meri terima kasih ngagai Menteri Besai laban ulih datai ngulu pengerami nya pengudah pulai ari penemuai gawa ke menua luar.
Iya nyemetak madah, Pengerami Gawai Dayak nyadi pelasar beguna terus negut kaul penyerakup sereta ulah bebasa ke pangan diri entara rayat pupu bansa enggau pengarap di Sarawak. – ASYRAF HALIM
