KUCHING: Perintah Sarawak mesti bebendar narit pemeranak puku muka dandang besai jagung awakka Sarawak nyadi pengeluar besai jagung di menua tu.

Adun Stakan Datuk Hamzah Brahim madahka nengah pengeluas tanah, Sarawak bisi peluang nanam jagung dandang besai dikena ngurangka menua tu kelalu bepanggai jagung ari menua bukai.

“Apin lama, Malaysia nagit ngeluarka 600,000 metrik tan jagung ungkup pemakai jelu tupi dalam timpuh 10 taun agi nengah 280 hektar palan ti udah dibuka ungkup nanam jagung ba Sarawak, Perlis, Kedah, Pahang enggau Perak.

“Diatu Malaysia ngimport 100 peratus jagung tauka urung dua juta tan setaun ari Argentina, Brazil enggau Amerika Syarikat,” ku iya.

Hamzah bejaku munyi nya rambau mantaika mosyen meri basa ngagai Tuai Pemegai Menua (TYT) Tun Pehin Sri Abdul Taib Mahmud maya bejadika Aum Dun kena 17 Mei tu tadi, di Dun, kemari.

Berebak enggau nya, Hamzah madahka pekebun mit di Sarawak patut ngerebut peluang tu nambahka pengeluar asil jagung.

“Sida ulih betanya ngagai Opis Betanam Betupi Sarawak enggau ejensi bekaul ngulihka lalau enggau bantu dalam nambahka asil tanam.

“Tu mega beguna dalam nentuka jagung ti ditanam engkeman ditanam ba tanah baruh enggau tanah tinggi awakka ulih meri penatai pemisi ti setipak,” ku iya.