KUCHING: Sarawak bisi juluk numbuhka lima palan data ti deka nyungkak ekonomi nengeri tumbuh nengah pejalai data ngilah adan menua manggai 2030.

Juluk nya nunjukka pengeran Sarawak masuk jeman digital enggau ngetanka penuduk nyadi nalan narit ati pemeranak puku dalam pengawa teknologi pemadah enggau komunikasyen.

Premier Sarawak, Datuk Patinggi Tan Sri Abang Johari Tun Openg madah, Sarawak diatu udah bisi Palan Data Tikas IV ti mega nyadi palan data neutral enggau diaku nyadi perengkaguna gadung.

“Aku pechaya Sarawak nyadi nalan pemadu ditapat ungkup pengawa beranakka puku dalam palan data tu.

“Kitai bisi endur enggau pemadu baguna, kitai bisi penau meri bekal kuasa ti ulih dikeandal enggau ulih nyungkak palan data tu,” ku iya.

Abang Johari nibarka jaku nya lebuh nyadi temuai dipebasa ba Pengerami Anugerah IBR Borneo 2023 ba sebuah hotel tebilang ditu, malam tadi.

Iya madah baru, palan data ulih dikena Sarawak nyapai siti ari tiga pugu besai ba Strategik Pemansang Udah Covid-19 (PCDS 2030) iya nya pemeruan rampa menua.