SEBUYAU: Sarawak deka nyadi tibang padi bedandang besai menua lalu sepemesai 50,000 ikar tanah deka dikemansang dikena ngamat juluk nya kelimpah nambahka pengawa ngemansutka pagi menua.
Sapit Menteri Besai, Datuk Seri Dr Ahmad Zahid Hamidi madah, semua sitak nya udah dikelala tang apin diputus.
“Berebak enggau nya, Premier Sarawak, Datuk Patinggi Tan Sri Abang Johari Tun Openg setuju lalu ngelala sitak ti besai tang ari sukut bejalaika projek nya endang begunaka sekeda timpuh.
“Kebuah pia kitai deka nyeraris agih belanja enggau Opis Menteri Betanam Betupi enggau Jamin Pemakai nyengkaum minta pemendar ari pengempu tanah,” ku iya.
Zahid mansutka jaku nya rambau aum pemberita pengudah Program Ngaul Rayat ba Balai Tebuka Sekula Primari (SK) Haji Bujang, Sebangan ditu, kemari.
Iya ti mega Menteri Pemansang Menua Pesisir enggau Wilayah madah, bepelasar ke Kaunsil Pemansang Betanam Betupi Muda (MADA), dikena bejalaika pengawa nanam utai tanam lima musin ba timpuh dua taun nya begunaka ungkus besai iya nya RM3 bilion.
Taja pia, iya madah, pekara bekaul ungkus nyadi pekara kedua laban dikena nangkup peminta diri empu nya pekara beguna sereta nyendia bekal berau ti chukup nyengkaum ba Sarawak enggau Sabah.
Pia mega, iya madahka diri udah minta FELCRA Berhad mantu nyendia tibang padi ba Sarawak baka ti bisi ba Perak.
“Bisi menua pemekal ti udah berengkah berunding enda agi nyendia bekal berau, aku enggai nyebut nama menua nya laban tu ngaul kaul diplomatik.
“Taja pia, kitai meseti bisi pengulih ngeluarka padi dikena ngasil berau ungkup menua kitai empu,” ku iya.
