SRI AMAN: Sarawak dulu sesingkang dalam napi ubah enggau pekara ke enda entu nyadi ba dunya, kelebih agi lebuh dunya nyingkang nuju jeman ke mayuh pemar. 

Premier Sarawak, Datuk Patinggi Tan Sri AbangJohari Tun Openg, madah tu mungkur isu kritikal baka pemansang teknologi, ubah gaya hari, rampa menua nadai karbon sereta pengawa ngiga kereban api nadai karbon. 

Ku iya, tu seriris enggau prinsip MADANI dipejalai Menteri Besai, Datuk Seri Anwar Ibrahim, dikena ngiga chara baru mutar isu nya. 

“Taja pia, kitai ba baruh Perintah Gabungan Parti Sarawak (GPS) udah dulu sesingkang mutar semua isu nya laban kitai udah tumu agi ngepunka pengawa tu ari menua bukai. 

“Kitai enda masau jam enggau penyarut ti tau ngeruga semua raban,” ku iya.

Iya madah munyi nya nengah teks jaku ke dibacha Sapit Premier Sarawak, Datuk Amar Douglas Uggah Embas, maya Pengerami Gempuru Hari Malaysia Renggat Sarawak 2024 ditu, Hari Satu. 

Pengerami nya udah dipenyadika Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar.

Sama datai bini Tun Wan Junaidi, Toh Puan Fauziah Mohd Sanusi.

Premier Sarawak nambah baru, Sarawak diatu benung chakah nyerungkai pengawa baru baka ngasilka kereban api beresi lebuh dunya betapi enggau dunya majak angat. 

“Nengah pansik ti enda ngetu, aku andal enggau ungkus pemansut hidrogen ulih dikurang nyadika kereban jauh murah sereta efektif dalam nagang penanggul pemansut karbon ti kelalu mayuh ba langit.  

“Enggau chara tu, kitai ulih mantu mutar pengangat gaya hari dunya sereta meri pangka ngagai pengawa global napi ubah gaya hari,” ku iya. 

Kelimpah nya, ku iya, Sarawak benung chakah ngaga pansik ngasilka minyak ari lukut di Bintulu ari SEDC Energy begulai enggau PETRONAS. 

Ku iya nerang, projek nya deka dikerembai ngagai 10,000 ikar, sereta dipelaba ulih ngasil 100,000 tung minyak lukut mata ninting hari manggai 2030.

“Sebuah kilang pemantis minyak bio tauka ‘bio-refinery’ deka ditumbuh ba Bintulu kena mantis minyak nya sepengudah ladang 10,000 ikar berengkah,” ku iya nerang. 

Berebak enggau nya,  Abang johari mega ngemeratka guna Sarawak dikena nyikap diri ari sukut nyendia pengereja ti landik dikena nyukung  aeroangkasa berindik ari Sarawak udah dikelala nyadi palan ti strategik endur ngelancarka satelit ngagai ruang angkasa.

Ku iya nambah, tu nyengkaum meri peluang latih enggau pelajar dalam bidang tu ba palan pelajar penggi Sarawak baka Palan Penyulut Teknikal Sarawak (CENTEXS).