KUCHING: Sarawak nyingkang ngagai jeman baru ba pemansang industri aeroangkasa lebuh nyadi tuai rumah terubah Konvensyen enggau Pemandang Aeroangkasa Asia Pasifik (APACE 2026).
Menteri Pelajar, Inovasyen enggau Pemansang Penau, Datuk Seri Roland Sagah Wee Inn madah, konvensyen nya diatur berengkah ari 27 nyentuk 29 Januari taun baru di Palan Konvensyen Borneo Kuching (BCCK). Ku iya, pengawa ngatur konvensyen nya dikeandal ulih ngangkatka Sarawak nyadi hab perebai enggau aeroangkasa tebangkar di Asia Pasifik.
“Tu siti sejarah besai ba pengawa kitai ngemansangka ekosistem aeroangkasa nengeri ti deka mai penemu pakar global ke Sarawak lalu ngerandang peluang kerejasama, meranak puku sereta inovasyen baru.
“Tu mih pelajar dikena negap penuduk Sarawak nyadi hab teknologi tinggi ari pemansang penau nyadi pugu besai,” ku iya ba aum media APACE2026 di Kompleks Kunsil Nengeri (DUN) ditu, ensanus. Sagah madah, APACE 2026 datai nyerumba pengeran perintah nengeri negap pemansang penau nengah Bajet Sarawak 2026, ti meri perati ngagai pengawa nempa pengereja teknikal, inovatif enggau sedia napi industri dudi hari.
“Pengelebih Sarawak nyadi nengeri bepuguka kuasa gadung ti ulih nyukung industri aeroangkasa moden, nyengkaum kilang maju, ngintu, miki enggau ngadu (MRO), sereta palan data ungkup industri aeroangkasa enggau new space.
“Ari pengulih kuasa gadung ti entap, Sarawak nyendia pelasar tegap endur industri aeroangkasa ti meruan tumbuh,” ku iya. Sagah mega madah, APACE 2026 mandangka pemansang penau nyadi siti ari pugu besai nengah sesyen forum ngena sulu jaku Pemujur Dudi Hari Aerotropolis, Aeroangkasa & Ekonomi Digital, Penerebai Meruan enggau Teknologi Gadung sereta Pemansang Penau Aeroangkasa.
Iya mega madah ke pengawa ngelanchar APACE 2026 deka dipenyadi Premier Sarawak, Datuk Patinggi Tan Sri Abang Johari Tun Openg kena 27 Januari 2026.
“APACE 2026 nyelinting ulih matak lebih 3,000 pengusung, 1,000 diligit, 50 pemandang sereta lebih 60 pengelicha antarabansa enggau lokal ba 50 sesyen konvensyen.
“Entara tokoh antarabansa ti disadang datai Dr Shamsul Kamar (NAICO), Joeri Aulman (NACO Netherlands), Dato’ Gs. Azlikamil Napiah (MYSA), Takehiro Nakamura (JAXA) enggau Laurence Lagriffoul (Novaspace),” terang Sagah.
Konvensyen nya kerejasama begulai MEITD enggau Business Connect Sdn Bhd sereta Business Events Sarawak (BESarawak) kelimpah nerima sukung tegut ari Opis Menteri Pengangkut Sarawak (MOTS), Unit Perambu Ekonomi (EPU) Sarawak, Opis Menteri Dagang Antarabansa, Industri enggau Meranak Puku (MINTRED), Ejensi Angkasa Malaysia (MYSA) ba baruh Opis Menteri Sains, Teknologi enggau Inovasyen Malaysia (MOSTI), Kaunsil Multimedia Sarawak (SMA) enggau Kaunsil Ekonomi Digital Sarawak Berhad (SDEC).
MEITD, PERKESO, Kolej Universiti i-CATS enggau Palan Penyulut Teknologi Sarawak (CENTEXS) mega ngatur Hari Kereja enggau Sesyen Licha Pelajar ba hari ketiga dikena meri peluang kereja ngagai rebak biak Sarawak ba pengawa aeroangkasa, injiniring, teknologi digital enggau operasyen penerebai.
APACE 2026 mega disadang diisi enggau pengawa nanggam lima ngagai tujuh Sempekat Pemereti Ati (MoU) ti deka nyungkak pemansang industri aeroangkasa nengeri. ASYRAF HALIM
