KUCHING: Sarawak kemari ngerikodka 324 kes baru dirampit Covid-19 nyengkaum empat kes pemati baru.
Komiti Penyangga Penusah Nengeri (JPBN) nengah siti penerang media madahka kes baru positif tu dirikodka ba Pelilih Menua Miri (146), Bintulu (36), Sibu (33), Kapit (22), Selangau (16), Pusa (13), Kuching (13), Saratok (10), Mukah (10), Beluru (5), Belaga (3), Subis (3), Sri Aman (2), Matu (2), Pakan (2), Sebauh (2), Sarikei (2), Bukit Mabong (1), Betong (1), Meradong (1) enggau Song (1).
Nya ngujungka penyampau kes positif di menua tu nambah ngagai 37,978 kes.
Ku penerang nya, ari 324 kes baru ti rikodka tu semina 41 iku aja bisi nunjukka kelai dirampit lebuh beperesa ke alai 272 iku endang ari orang ti diasuh kuarantin.
Nangkan nya, berindik ari empat kes pemati baru kemari penyampau kes pemati ketegal Covid-19 di menua tu bisi 219 iku.
Empat kes pemati tu ngaul dua iku indu enggau dua iku lelaki beumur entara 63 ngagai 92 taun.
Dua iku indu nya dirikodka ba Palan Kuarantin Berubat Covid-19 Pesakit Regas(PKRC) Bintulu enggau Sepital Sarikei ke alai dua iku lelaki dirikodka ba Sepital Sarikei enggau Sepital Kanowit.
Taja pia, sida mega bisi ngembuan penyakit bukai baka kemi manis, darah tinggi enggau sakit tungkul sengayuh.
