KUCHING: Rayat pupu bansa ti diau ba nengeri tu ngemeranka ulah bebasaka pangan diri lalu mai Sarawak nyadi nengeri ti nyelai, likun, lantang enggau bisi kelas kediri empu.
Premier Sarawak, Datuk Patinggi Tan Sri Abang Johari Tun Openg madah, penyelai ke dikembuan rayat pupu bansa enggau jalai pengarap ulih ngemujurka juluk perintah ngangkatka status nengeri tu,
“Aku diberi peluang nyadi tuai ba nengeri tu, Allah S.W.T udah milih aku nengah sukung rayat lalu aku naka ulih ngangkatka rayat enggau Sarawak ngambi orang bukai bebasaka kitai.
“Aku meri terima kasih ngagai semua laban kita bisi budaya bebasaka pangan diri ti ngasuh kitai nempa mayuh penyulut enggau pemujur,” ku iya.
Abang Johari bejaku munyi nya ba mua mayuh rambau Pengawa Gempuru Ma’al Hijrah Renggat Sarawak 1445H/2023M di Dewan Kompleks Islam Sarawak ditu tadi.
Iya madah, taja Sarawak diuan rayat pupu bansa tang nengeri tu tetap ulih ngaduka pemansang menua enggau manah sereta meruan.
