SERIAN: Pemayuh tubuh bala tuai Dayak ke datai ngulu Pengerami Ngintu Gawai Dayak 2026 Bukit Semuja nyata ngayan semangat segulai sejalai enggau begempung raban bansa Dayak nyukung agenda pemansang nengeri nyapai juluk Sarawak Maju 2030.
Sapit Premier Sarawak, Datuk Amar Douglas Uggah Embas madah, bala tuai enggau raban bansa Dayak ke begempung beguna endar nentuka semua agenda pemansang ke dilanggur ulih diadu enggau nemban sereta meri pemaik ngagai rayat.
Ku iya, pengeran ke dipandang bala tuai Dayak nyukung polisi enggau inisiatif perintah ngayanka pengeransing semua raban besaup ngemansangka Sarawak ngagai tikas ke maju agi enggau ulih besemekih.
“Bala tuai Dayak ke datai ba pengerami tu ngayan pemereti ati, penyerakup enggau segulai sejalai ngemujur siti misyen enggau agenda ke sama, iya nya ngamatka visyen Sarawak Maju 2030,” ku iya.
Uggah nibar ke jaku nya ba Pengerami Ngintu Gawai Dayak 2026 Bukit Semuja di Balai Babuk Salog, Kampung Riih Daso, Hari Satu tu tadi.
Iya mega meransang raban bansa Dayak terus ngetanka semangat penyerakup enggau kerejasama ke nyadi pun ngagai penegap enggau pemansang nengeri.
Sama datai, Menteri Pelajar, Inovasyen enggau Pemans Penau Sarawak, Datuk Seri Roland Sagah Wee Inn, Menteri Industri Pemakai, Komoditi enggau Pemansang Kandang Menua Sarawak, Datuk Seri Stephen Rundi Utom enggau Menteri Kereja Raya, Datuk Seri Alexander Nanta Linggi.
Bisi mega datai iya nya Sapit Menteri Industri Pemakai, Komoditi enggau Pemansang Kandang Menua Sarawak, Datuk Martin Ben, Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan, Kaban Kunsil Nengeri (ADUN) Bukit Semuja, John Ilus, ADUN Serembu, Datuk Miro Simuh sereta Datuk Amar Michael Manyin Jawong. – EDISI UKAS
