KUALA LUMPUR: Perintah Sarawak mantaika sekeda perambu bekaul meranak puku enggau pemansang industri ungkup diperundingka ba Bajet Perintah Besai 2027, lebih agi ngaul insentif meranak puku, industri strategik sereta infrastruktur industri.
Pekara nya entara batang randau Sapit Premier Sarawak ke mega Menteri Dagang Antarabansa, Industri enggau Meranak Puku Sarawak, Datuk Amar Awang Tengah Ali Hasan lebuh ngatur penemuai basa ngagai Menteri Meranak Puku, Dagang enggau Industri Malaysia, Datuk Seri Johari Abdul Ghani, ditu kena Hari Satu.
Ku penerang media, randau nya bela meri perati ngagai pengawa ngenegapka kerejasama Perintah Sarawak enggau Perintah Besai dikena matak pengawa meranak puku bisi kualiti enggau berega tinggi, nambahka semekih industri sereta nyukung pemansang ekonomi timpuh panjai Sarawak.
Kededua raban bela berandauka peluang ngerembaika industri berega tinggi enggau baru nyengkaum kilang pemadu maju, semikonduktor, ekonomi digital, energi beresi sereta aktiviti hili ili enggau bepuguka teknologi.
Berebak enggau nya, pemesai guna nyendiaka insentif, infrastruktur, pengelandik enggau ekosistem meranak puku ke engkeman bela diberi perati dikena nyukung pengawa meranak puku baru tama sereta ngerembaika industri ke udah bisi.
Penerang nya madah baru, Perintah Sarawak meri perati ngagai pekara nya seriris enggau Pelin Pemansang Udah COVID-19 (PCDS) 2030 enggau agenda meranak puku sereta industri Malaysia, lebih agi numbuhka pengawa puang bisi kualiti, ngemansangka pengelandik lokal, ngenegapka dagang lokal sereta meransang teknologi enggau inovasyen.
Kededua perintah bela naka ulih ngenegapka kerejasama ngemuntangka chara meranak puku strategik, ngenegapka pemansang industri enggau ngerandang mayuh agi peluang ekonomi ngagai Sarawak sereta Malaysia.
Datuk Amar Awang Tengah bela disempulang Penyanding Penemu Opis Menteri Dagang Antarabansa, Industri enggau Meranak Puku Sarawak (MINTRED), Dato Sri Mohd Naroden Majais, Sekretari Mendam MINTRED, Datu Lester Matthew sereta pegawai kanan MINTRED. — EDISI UKAS
