KUCHING: Operasyen menih remang benung diperunding dipejalaika dikena mutarka penanggul tikas ai langkang ba tekat ai hidroelektrik, bekau ari kemarau ti majak nyadi di serata nengeri maya diatu.
Sapit Premier Sarawak ti mega Chairman Komiti Penyangga Penusah Nengeri (JPBN) Sarawak, Datuk Amar Douglas Uggah Embas madah, nya berindik ari sida ti nerima ripot ari Sarawak Energy Berhad (SEB) ti madah ke tikas ai ba tekat ai hidroelektrik chukup langkang.
“Nya alai, kami deka beratika gaya tu enggau gaya hari ti engkeman sebedau bejalaika operasyen menih remang.
“Kitai beterima kasih laban udah bisi ujan, abis nadai nya udah nyaup ngurangka menua besebun,” ku iya. Uggah bejaku munyi nya lebuh ditanya pemberita pengudah bejadika pengawa nyuaka chek geran Renggat 1 ba Kompleks UNIFOR ditu, kemari.
Ku iya, taja tebal agi bacha Tikas Pengamah Angin (API) diatu ba tikas ti jelan tang isu bekal ai agi nyadi ba menua pesisir.
Berindik ari nya, iya madahka diri udah minta Residen enggau JPBN ba renggat Bagi Menua berati sereta bejalaika atur enggau lengkas.
“Aku udah madah ngagai sida ngambika ningaka sebana ti diterima lalu sebana tu meseti dipansik sereta diberi perati, seraya bekal ai meseti dianjung ngagai peranak ti begunaka nya,” terang iya. Iya mega nangkan nya madahka diri udah ngelalau Opis Bekal Ai Menua Pesisir (JBALB) ngatur pengawa bekaul enggau isu suntuk bekal ai tu.
“Enti gaya kemarau majak nyadi, kitai bisi strategi dikena napi penanggul tu, kelebih agi di menua pesisir,” ku iya nyemetak.
