KUCHING: Perintah Sarawak majak ransing ngerumban transformasyen digital sektor pengerai betuai ke Premier Sarawak, Datuk Patinggi Tan Sri Abang Johari Tun Openg Sapit Premier Sarawak, Datuk Amar Dr Sim Kui Hian madah, juluk nya ulih dipenyadi ari ngangkatka nengeri tu nyadi pengemudi pendigitalan klinik pengerai di Malaysia.
Ku iya, pengawa nya dipejalai nengah belanja perintah nengeri dikena ngerumban pejalai pendigitalan ba semua klinik pengerai di kandang menua tu.
“Naka diatu, bisi 175 ari 271 Klinik Pengerai di Sarawak udah beoperasyen ngena chara digital lalu enda ibuh ngena rikod keretas (paperless), lalu nya ngasuh akses ngagai rikod pesakit ulih diadu enggau jampat sereta sikar.
“Lebuh Perintah Besai madah ke niat ngadu digital Klinik Pengerai tang nadai belanja ti chukup, Perintah Sarawak meri belanja.
“Diatu, 175 ari 271 Klinik Pengerai di Sarawak udah didigitalka lalu nya pemadu mayuh di Malaysia.
“Inisiatif tu ukai semina deka nyadi pemadu mayuh, tang nentuka rayat bulih pemaik nyengkaum sida ti diau jauh di menua entigis Borneo,” ku iya.
Dr. Sim nyebut pekara nya ba mua mayuh rambau Konvensyen Antarabanga Sains BioPengerai Ke-5 (IBSC) 2026 ditu, kemari.
Ku iya, fasiliti pengerai tikas dunya patut disukung pansik enggau inovasyen dikena nentuka pengawa berubat seruran ngerembai nipak peminta komuniti.
“Sepital Besai Sarawak (SGH) diatu nyadi taba pansik klinikal pemadu manah menua kenyau ari empat taun ti udah, nyengkaum nyadi sepital keterubah di rantau Asia Pasifik ti dipilih bejalaika peresa klinikal “first-in-human” sereta semina nya aja sepital di Asia Tenggara diberi pengandal nya.
“Pemujur nya nyadi entara pekara ti meransang perintah nengeri ngemendarka pengawa nirika Pala Riman Sarawak di Kota Samarahan sebedau tu.
“Premier nyukung tegut perambu tu laban kitai deka ke rayat Sarawak bulih pemaik.
“Perintah nengeri ngagihka RM1 bilion dikena nirika sepital nya, dientudi belanja tambah RM500 juta khas dikena nyendiaka kereban perubat.
“Ari ungkus ke diatu, semua rega projek tu disadang ngelui ari RM1.5 bilion datai ba maya beoperasyen taun 2031,” ku iya.
Ngenang silik, Dr. Sim madah ke pansik aja empai chukup enti asil saintifik ti ditemu puntan dikena ba servis pengerai ti ulih diakses serap komuniti.
Iya nyemetak madah, pemansang kebendar semina ulih dijapai enti inovasyen dikena ba sistem pengerai nengah beperesa tumu, diagnostik moden, perubat pakar, teleperubat sereta kerejasama rat entara pemansik, profesional pengerai enggau industri.
“Aku ngaku takah akses ngagai servis pengerai bisi kualiti majak jauh, lalu nya begunaka polisi ti meruan agi nentuka perengkaguna enggau perubat pemadu manah ulih diasai rayat nadai ngira menua tauka pemisi belanja.
“Juluk Sarawak deka ngemansangka ekosistem pengerai ti ulih beretan nengah transformasyen digital, pansik besai empas, kerejasama strategik begulai enggau Universiti Sains Malaysia (USM).
“Tu mega nyengkaum pemansang penau lokal ngambi rayat Sarawak nyadi terabai ba pengawa nyaga pengerai enggau inovasyen perubat,” ku Dr.Sim.- TVS
