KUCHING: Sarawak keran nyapai juluk nyadi menua bepelasar ekonomi hidrogen dikena numbuh mayuh agi stesyen hidrogen.

Nya kebuah, Chairman Kaunsil Pemansang Ekonomi Sarawak (SEDC), Tan Sri Abdul Aziz Husain madah, sida keran ngerembai pengawa ngena entukar bekuasa hidrogen ba menua tu.

Ku iya, naka diatu siti ari stesyen nya udah beoperasyen ba Darul Hana, Petra Jaya seraya sebuah agi ditumbuh ba Batu Kawa.

“Lima stesyen hidrogen deka ditumbuh ba Kuching lalu pengawa numbuhka stesyen ba mengeri besai bukai benung dipejalai baka Bintulu, Miri, Sibu enggau Sri Aman,” terang iya.

Abdul Aziz mansutka jaku nya pengudah Pengawa Nyerah Entukar Bekuasa Hidrogen, Toyota Mirai ngagai Sapit Premier Sarawak ti dipenyadi Premier Sarawak Datuk Patinggi Tan Sri Abang Johari Abang Openg ba laman Wisma Bapa Malaysia, Petra Jaya, ditu tadi.

Ku iya, pengawa numbuh mayuh agi stesyen hidrogen nya seraris enggau juluk Sarawak deka ngerembai pengawa ngena entukar hidrogen.