INFO
Komiti pengatur bekal pemakai deka betuaika Sapit Kepala Menteri Datuk Amar Awang Tengah Ali Hasan lalu komiti pengelikun betuaia Sapit Kepala Menteri Tan Sri James Jemut Masing.
KUCHING: Perintah Sarawak numbuhka dua komiti mit iya nya ngatur bekal pemakai enggau pengelikun berindik ari pengerekai igi penyakit Covid-19 ti ditapi ba serata dunya.
Kepala Menteri Datuk Patinggi Abang Johari Tun Openg madah, dua komiti mit ngatur bekal pemakai deka betuaika Sapit Kepala Menteri Datuk Amar Awang Tengah Ali Hasan enggau komiti pengelikun dipegai Sapit Kepala Menteri Tan Sri James Jemut Masing.
Taja pia, Kepala Menteri enda nerang silik pasal tanggungpengawa dua komiti mit nya lebuh udah ngepunka aum sida kemari.
“Nengah Aum Pengelikun Nengeri, kami besetuju numbuhka dua komiti mit lebuh Atur Nagang Pejalai (PKP) dilanjar dua minggu agi nyentuk 14 April tu.
“Berindik ari nya, aku nangkas semua rayat Sarawak nitihka PKP enggau diau jenuh ba rumah aja,” terang iya.
Abang Johari mansutka jaku nya ba aum pemberita di Wisma Bapa Malaysia disempulang tiga sapit iya, Awang Tengah, James Masing enggau Datuk Amar Douglas Uggah Embas, ditu kemari.
Abang Johari madah, Perintah Sarawak deka neritka atur ba garis entara menua enggau matau pejalai rayat menua luar ti tama ari menua sepiak ngambi nagang pengerekai igi penyakit Covid-19 ti diimport.
“Kami deka matau silik agi pasal empas bejalaika Pakej Bantu Khas Sarawakku Sayang Covid-19 ngagai mensia mayuh.
“Kami mega deka matau pejalai inisiatif ekonomi ti udah dibantai,” tandu iya.
Terang iya, Perintah Sarawak deka beratika empas PKP ba pemansnag ekonomi di menua tu.
“Kami enggau naka ulih ngiga chara mutarka pekara tu ngambi rayat ulih ngereja pengawa baka selama.
“Nya kebuah, Putrajaya udah ngelanjar timpuh PKP lalu kitai patut nitihka atur nya enggau semua rayat Sarawak patut diau jenuh ba rumah,” ku Abang Johari.
Sama datai Menteri Kaunsil Kandang Menua enggau Pengawa Berumah Datuk Sim Kui Hian, Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit Datuk Seri Fatimah Abdullah sereta Menteri Utiliti Datuk Seri Stephen Rundi Utom.
