SIBU: Sarawak benung nyerungkai kerejasama strategik enggau Singapura ba bidang dagang karbon sereta teknologi mantis ai tasik dikena ngerandang pengawa meranak puku enggau kerejasama baru entara kededua menua.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, kerejasama ba bidang karbon ngaul aktiviti nyimpan enggau dagang karbon seriris enggau pekara ari baruh Sempekat Paris.
Ku iya, pengawa nya dipejalai laban Singapura nyadi siti menua ke deras mansang enggau mega ngelepas gas karbon dioksida.
“Reti nya, sida deka ngiga makit bepelasarka dagang karbon.
Pekara tu bemalinka Sempekat Paris dikena mutar karbon dilepas menua nya” ku iya.
Iya nyebut munyi nya lebuh dirandau pemberita pengudah bejadika Gempuru Besai Tiga Taun Sekali Gerempung Nembiak Nasional Begempung Sarawak (SABERKAS) Ke-18 ditu, kena Hari Minggu.
Kelimpah ari isu dagang karbon, Datuk Patinggi Abang Zohari mega madah ke Sarawak enggau Singapura berati ke pengulih bekenaka teknologi baru dikena mantis ai tasik.
Taja pia, iya nyemetak madah ke randau bekaul pekara nya agi ba renggat nyerungkai lalu apin diputuska.
“Udah bisi teknologi ke ulih mantis ai tasik. Kitai deka meda gaya randau tu nitih ke peminta bekal ai ila.
“Pekara tu apin diputus laban kitai agi ba renggat nyerungkai,” ku iya madah baru. — EDISI UKAS
