KUCHING: Sarawak ngerikod skor 9.57 ba Tikas Pengelantang Ruang Bilik (IKK) 2025, nambah ari 7.09 ba taun 2016 enggau 7.78 taun 2019, lalu nya ba tikas tinggi bepelasarka taka serenih tikas nya.
Menteri Pemansang Indu, Nembiak Mit enggau Pengelantang Komuniti, Datuk Sri Fatimah Abdullah madahka IKK ke digaga Kaunsil Peranak enggau Pengelantang Ruang Bilik Menua (LPPKN) nyerenih pengelantang ruang bilik bepelasarka lapan batang pekara.
Ku iya, pekara nya mungkur kaul diri sebilik, ekonomi ruang bilik, pengerai, pengelikun, kaul komuniti, pengarap enggau pengawa pengasih, rumah enggau rampa ngelingi sereta ruang bilik enggau teknologi komunikasyen.
“Ba taun 2016, Sarawak ngerikod skor 7.09, udah nya niki ngagai 7.78 ba taun 2019, niki baru ba taun 2022.
“Taja pia, nya alah ari tikas pengelantang nasioal, lalu taun 2025 skor Sarawak ungkup tikas pengelantang ruang bilik tu iya nya 9.57, pemadu tinggi,” ku iya.
Fatimah nyebut pekara nya lebuh nibarka jaku ba mua mayuh maya Pengerami Anugerah Servis Nyulut Opis Menteri Pemansang Indu, Nembiak Mit enggau Pengelantang Komuniti (KPWK) enggau Ejensi 2025 ba siti hotel ditu, malam kemari.
Iya madah, Sarawak, Pulau Pinang enggau Wilayah Persekutuan Labuan nunjukka tikas niki ke nyengala ba IKK taun 2025.
“Penyulut nya ngayanka asil pengawa seruran ngangkatka pengelantang ruang bilik enggau komuniti nengah mayuh inisiatif ke dipejalai raban agensi enggau unit ari baruh opis menteri nya.
“Pengawa nya mega meri empat ngagai tikas pengelantang rama, nyengkaum Tikas Pengelantang Rama enggau tikas pengaga,” terang iya.
Fatimah madahka pemujur IKK nya patut majak ditambah nengah program enggau intervensi dipejalai ke meri perati ngagai pengelantang ruang bilik sereta semu komuniti.
Sama datai, Direktor Opis Pengintu Pengelantang Mensia Mayuh Sarawak (JKMS), Semawi Mohamad; Direktor Opis Indu enggau Ruang Bilik Sarawak (JWKS), Sharifah Zakiah Tuanku Pauzi, Sapit Direktor Perintah Besai, JKMS, Mohd Ali Taib, Sekretari Eksekutif, Kaunsil Pemansang Rama, KPWK, Rizjandy Nawawi; sereta Menijar Besai SeDidik Sdn Bhd, Ayub Dahari. – EDISI UKAS
