“Kerejasama (enggau Perintah Besai) tu semina ungkup pekara rasmi lalu ukai program politik.”

KUCHING: Sarawak sedia bekerejasama enggau Perintah Besai dalam ngerembaika infomasyen pasal perambu enggau program pemansang.

Sapit Kepala Menteri Datuk Amar Douglas Uggah madah, pekara tu beguna amat ngambika rayat Sarawak bulih infomasyen ke betul.

Iya madah baka nya rambau berandau enggau Sapit Menteri Komunikasyen enggau Multimedia Eddin Syazlee Shith ditu, kemari.

Uggah madahka, perintah nengeri nadai sebarang penanggul enggau raban Kabinet Parlimen ti datai ngelawa Sarawak seraya kerejasama nya ulih dipejalaika.

MANAH KAUL… Perintah Sarawak betemu enggau piak Perintah Besai ngambi berandau pasal kerejasama dikena madahka infomasyen pasal pemansang.

“Kitai ulih mantu dalam ngatur logistik lebuh nyediaka atur sida enggau sebarang peminta deka dianjung ngagai Unit Protokol enggau Pengawa Ngatur Pekara Nengeri (UPPAN) dulu.

“Kerejasama (enggau Perintah Besai) tu semina ungkup pekara rasmi lalu ukai program politik,” ku iya.

Uggah madah, tajapan perintah nengeri berasai irau tang kaul enggau perintah besai agi mengkang ari sukut perambu enggau program ti meri penguntung ngagai kededua piak.

“Nambahka nya,aku empu udah dichiri nyadi chairman begulai enggau Menteri Kereja Raya Baru Bian dalam pengawa perintah nengeri enggau Komiti Pengatur Perintah Besai dikena matau pejalai semua projek Besai ke mujur ba nengeri tu,” ku iya nambah.

Berebak ari nya, Uggah ti nyadi Chairman Komiti Pengatur Penusah Enda Disadang Nengeri Sarawak madahka asa ketegal kurang berita diberi Radio Televisyen Malaysia (RTM) pasal operasyen anti rabies ba ditu.

“Kitai ngembuan ejensi Besai baka Pengatur Penusah Enda Disadang Nasional, Komiti Pengerai (NADMA), Opis Menteri Pengerai, Opis Servis Veterinar di Putrajaya, polis, soldadu, Opis Bomba enggau Penyah Penusah sereta Raban Penyaga Pengelikun Mensia Mayuh ti bekerejasama enggau piak kitai dalam penanggul tu,”

Pia mega, lebuh iya ngenang RTM enda datai ngaga berita ba tiap aum ti diatur.

“Pekara tu chukup sinu laban kitai patut madahka strategi dikena nagang igi penyakit nya ngagai bala rayat.

“Kami deka neruska operasyen anti rabies ngagai bagi menua bukai di engeri tu pengudah tembu kemisi Hari Raya tu ila,” ku iya nerang.

Nya alai, Uggah ngarapka sebarang penyarut ulih diputarka jampat.

Menteri Muda Pekara Korporat Sarawak Abdullah Saidol mega bisi datai rambau randau nya ngelalau Komiti Komunikasyen enggau Multimedia Malaysia (SKMM) enggau polis ngambi atur jampat ngagai sida ti mandangka isu pengarap enggau isu raban bansa ti ngerekai ba media rama.

“Ba Sarawak, kitai ngembuan atur enda meri peluang dalam pekara baka tu.

“Atur serius meseti digaga jampat ngagai orang ke nguji ngeruga pengelikun enggau pengelantang dalam komuniti kitai,” ku iya.

Abdullah ngarapka sebarang ripot ti digaga ngagai piak polis tauka SKMM, atur bekaul deka terus digaga jampat.

Suara Sarawak