Presiden Indonesia ngaga pemutus mindahka palan pengatur pengawa ari Jakarta ke Kalimantan
KUCHING: Sarawak semina ngemata pemutus Presiden Widodo tauka Jokowi ti deka mindahka palan pengatur pengawa menua Indonesia ke Kalimantan.
Kepala Menteri, Datuk Patinggi Abang Johari Tun Openg madah, Sarawak semina ngemataka pemutus presiden nya ti deka mindahka palan pengatur pengawa menua nya ke Kalimantan.
“Nya pengawa menua Indonesia lalu kitai semina ulih ngemata aja.
“Lalu enti nyema diguna, kitai (Sarawak) deka meri kerejasama,” ku iya.
Iya madah munyi nya maya dirandau pemberita rambau Program Korban Perdana Kaunsil Islam Sarawak beserimbai enggau Hari Raya Aidiladha ditu ensanus.
Nengah portal berita nasional kena 6 Ogos tu tadi, Jokowi madahka deka neruska perambu mindahka palan pengatur pengawa Indonesia ke Kalimantan.
Jokowi madah iya udah ngatur randau enggau sekeda piak bekaul dikena nentuka pelilih menua ke dipilih nyadi palan pengatur pengawa baru Indonesia nukar Jakarta.
Iya mega madah pejalai ngagai palan nya udah digaga lalu pemutus udah ditetap iya nya milih menua Kalimantan nyadi palan pengatur pengawa ke baru.
