Sarawak udah sedia endur ngintu Hari Malaysia

KUCHING: Sarawak dipilih nyadi tuai rumah ngintu Hari Malaysia kena 16 September tu ila.

Kepala Menteri Datuk Amar Abang Johari Tun Openg madah Menteri Besai Tun Dr Mahathir Mohamad merambu milih Sarawak nyadi tuan rumah ngintu Hari Malaysia maya nya ila.

“Kaul entara perintah besai enggau perintah nengeri agi manah lalu bala menteri ari perintah besai bisi udah ngusung kitai kitu.

“Bulan nyin kemari lebuh baum pasal Sempekat Malaysia (MA63), Menteri Besai bisi madah merambu deka ngintu Hari Malaysia kena 16 September ila ba Sarawak lalu aku nyaut Sarawak udah besedia,” ku iya.

Abang Johari madahka pekara nya maya ditanya pemberita ba Pengerami Ngelalu Pengabang Hari Raya Aidilfitri Kaban Perlimen Petra Jaya Datuk Seri Fadillah Yusof ba Palan Aum CIDB ditu, kemari.

Kelimpah ari nya, iya madah Komiti Pemansang Nengeri Sarawak diatu diketuai entara Menteri Kerja Raya Baru Bian enggau Sapit Kepala Menteri Datuk Amar Douglas Uggah Embas mandangka kaul kedua piak majak manah kena matau projek perintah besai ba Sarawak.

“Tu mantaika bisi kerejasama ti rat ba pengawa ti dilanggur sida nuju pemanah pemansang Sarawak taja perintah besai dipegai Pakatan Harapan (PH) lalu Sarawak dipegai Gabungan Parti Sarawak (GPS),” ku iya

Ngelansa aum MA63 iya madah proses berunding agi dipejalai.

Udah nya, iya madah Projek Jalai Pan Borneo diatu ba tikas 70 peratus tembu.

“Kami endang dipadah pasal projek tu diketuka perintah besai tang meda ari sukut bukai dulu laban projek tu udah manggai 70 peratus deka tembu.

“Awakka sida beratika dulu pekara tu tauka ngena chara bukai, tang aku meda sehari tu Menteri Kerja Raya Baru Bian bisi ngeluarka jaku nya alai kitai deka merati dulu,” ku iya.

Penatai Abang Johari dikelauka Datuk Seri Fadillah Yusof enggau bini iya Datin Sri Ruziah Mohd Tahir maya ngulu pengerami nya.

MANAH KAUL…Kepala Menteri Datuk Amar Abang Johari Tun Openg (dua kiba) enggau Kaban Perlimen Petra Jaya Datuk Seri Fadillah Yusof (kiba) begambar enggau pengabang ti bisi datai di Palan Aum CIDB ditu, kemari.

Suara Sarawak