KUCHING: Jematan Datuk Amar Juma’ani marit pemansang moden ti deka ngubah rampa genturung pendiau asal Melayu ba tetengah mengeri besai Kuching.
Premier Sarawak, Datuk Patinggi Tan Sri Abang Johari Tun Openg madah, jematan nya mandangka pengeransing peranak dia ngambi bagi ba arus pemansang mengeri pintar enggau moden nipak pemansang teknologi.
Penyelai langkar jematan ti nyau deka sebaka enggau Jematan Erasmus di Rotterdam, ku iya, nya deka negapka agi inisiatif perintah nengeri ngangkatka Satok nyadi sitak mansang tikas antarabansa.
“Enti Bintulu bisi jematan baka Golden Gate di San Francisco, mengeri besai Kuching bisi Jematan Darul Hana, lalu diatu ba tetengah genturung pendiau bediri gah Jematan Datuk Amar Juma’ani.
“Jematan baka di Rotterdam tu asil tengkebang injiniring ti chukup nyelai, mandangka komuniti Melayu mega ulih berubah, maju enggau besemekih ba pemansang dudi hari.
“Bebida, nyelai enggau ngayanka transformasyen genturung pendiau asal nyadi sitak strategik pemansang,” ku iya lebuh bejadika Jematan Datuk Amar Juma’ani ditu, malam kemari.
Abang Johari mega bekunsi juluk ati ngangkatka sitak Sungai Bintangor nyadi palan dagang temuai nyelai, disikap meruan enggau gondola (perau) baka di Venice
. “Enti Venice bisi gondola, kitai mega ulih ngaga Gondola Bintangor dikena ngenapka pemanah rampa jematan tu.
Aku pechaya kitai ulih nyapai juluk tu laban udah bisi pugu,” ku iya lalu nerima sukung mensia mayuh ti datai.
Kelimpah ari nya, Abang Johari madah ke jematan nya nyadi penyungkak ngagai pemansang besai ti benung enggau deka dipejalai ba sitak Satok nyengkaum projek Hikmah Exchange, Kuching Sentral ba sitak Padang Pasir sereta tebing ai ti disambung terus ke Jematan Satok.
“Sitak Padang Pasir ti suba bisi stesyen kerita api lama, diatu deka diangkat nyadi stesyen besai Transit Aliran Automasi (ART).
“Pemansang tu semua bepalan ba tetengah genturung pendiau, baka Masjid Bintangor enggau Haji Taha,” terang iya lenak.
Abang Johari mega nyemetak madah ke pemansang deras ti dilanggur enda ngachau pengelantang enggau hak komuniti menua nya.
Tang ku iya, projek dikemansang ngena chara inovatif enggau inklusif, sereta nentuka reta tengkira tetap dipenggi rayat.
“Mayuh rumah ditu diatu nyau puang laban mayuh udah pindah.
Tang ari projek besai ti dipejalai, tu deka ngubah nyadi genturung pendiau moden Melayu chunto di Sarawak.
“Kitai bisi chara baru. Ulih didirika apartment tauka rumah moden tang unit nya tetap diempu peranak dia. Reta tengkira enda lenyau tang diberi ‘kedap’ baru.
“Nadai mejal. Tang ari perengkaguna tu, rega aset deka niki. Sitak tu deka seikas menua East Perth di Australia ti suba tinggal pemansang, tang diatu pemadu ditapat pengudah jematan ikonik digaga,” ku iya.
Abang Johari mega madah, perambu enggau pejalai projek nya ila deka dirandau silik enggau Kaban Kunsil Nengeri (ADUN) Satok, Datuk Ibrahim Baki sereta ngaul peranak dia.
