PADAWAN: Polis diatu benung ngiga saspek ti dipelaba naban ke sebuah motosikal bansa Yamaha MT-15 ba mua sebuah rumah ba Taman Malihah, Jalan Matang-Batu Kawa, malam kemari.
Tuai Polis Pelilih Padawan, Superintendan Abang Zainal Abidin Abang Ahmad madah, raban sida ngenuku bisi nerima ripot bekaul pekara nya lalu udah muka keretas pansik.
“Kes tu dipansik ba baruh Seksyen 379A Kanun Keseksaan lalu enti dikenuku salah, saspek ulih diukum jil enda kurang ari setaun.
“Raban polis diatu benung chakah ngiga saspek sekali saspek peranak menua tu empu tauka ukai,” ku iya ba sebengkah penerang, sehari tu.
Nya alai, Abang Zainal minta mensia mayuh ti bisi meda saspek nepan motosikal ti ‘ngirauka ati’ nya diperansang ngeripot ngagai raban polis.
Pia mega, iya ngelalau mensia mayuh ngambi nyendia kunchi tambah ungkup motosikal sida sereta enda ngengkah motosikal sepeneka ati.
Iya mega ngelalau rayat ngambi bejimat lebuh ninggalka barang berega.
“Anang sekali meri ruang laban nya ulih nyadi peluang ngagai orang ti enda beradat ngereja penyalah.
“Mensia mayuh mega diperansang bekunsi sebarang penerang bekaul ngagai raban polis dikena nagang penyalah enggau mai saspek ngagai kort,” ku iya.
