MIRI: Sepital Miri benung ngiga waris tauka kaban belayan siku pesakit lelaki beumur 80 taun ti benama Badan Sanni tauka Enturan Sanni.

Bepelasar ke penerang ari Sepital Miri, pesakit nya ngempu kad pengelala 430819-13-XXXX lalu adres kepenudi tudah iya nya Kampung Lusut Jaya 1, Miri.

Ungkup penerang, pesakit nya datai ari Rumah Penguang, Sungai Banyok, Batang Igan, Sibu.

Penerang sebaka madah, mensia mayuh tetemuka tudah enda ngeleda kena 3 Oktober lalu dianjung ngagai Sepital Miri ngambi diperubat.

“Lebuh dipasuk ba Opis Emijensi enggau Trauma Sepital Miri, tudah nadai ngembuan sebarang pengelala diri enggau sida sebilik.

“Tudah enda lanchar bejaku lalu tu meri pemar ngagai raban sepital ti deka ngulihka penerang beguna ari iya.

“Diatu tudah benung dipasuk ba Opis Emijensi enggau Trauma seraya nganti pewaris enggau kaban belayan mai tudah pulai.

“Inisiatif ngiga kaban belayan tudah udah dipejalai tang raban sepital enda mujur ditemu kaban belayan iya nyentuk diatu.

“Nambahka nya, tudah nadai nyimpan lumur telefon sida sebilik tauka kaban belayan diri,” ku penerang nya.

Nya alai, raban Sepital Miri ngelalau pewaris, kaban belayan enggau mensia mayuh ti ngelala tudah ngambi betelefon terus ngagai Opis Kereja Rama Perubat, Norlida Samat ba lumur 085-460633 maya jam gawa Hari Satu nyentuk Hari Lima tauka terus ngelawa Opis Emijensi enggau Trauma enggau lengkas.