SEB deka lengkas mutar 9,000 penguna tejanggal kuasa karan

KUCHING: Urung 9,000 penguna di Bau-Lundu, Sematan enggau Telok Melano tejanggal bekal kuasa karan ketegal bisi penusah tanah tusur di Jalai Besai Bau-Lundu.
Sarawak Energy Berhad (SEB) madahka, dua iti tali 33 kV putus ketegal penusah tanah tusur ti numbangka tiang karan enggau ngmutuska wayar karan baruh tanah.
“Tali besai diripotka putus kena 11.30 malam Hari Tiga lalu Sarawak Energy begaut nganjung raban operasyen meda pangka tanah tusur ti nabanka tiang karan nya tumbang. Taja pia, kereja nyeruri enda ulih dipejalai laban palan nya udah ampuh.
“Tali kedua mega putus kena 10.45 pagi Hari Lima pengudah siti agi penusah tanah tusur ti ngasuh kabel karan baruh tanah jai. Kereja nyeruri palan nya semina ulih dipejalai pengudah palan nya dikupas,” ku iya.
Kelimpah ari nya, Menijar Wilayah Barat Sarawak Energy Choo Min Chong madahka, raban sida bebendar mutarka penanggul tu lalu pengawa ngaduka tiang karan dipelaba tembu pukul 10 malam kemari.
“Tanah berubah enggau gaya mua hari ti jai udah nekul pengawa raban kami mutarka penanggul tu.
“Kami deka ngaduka baru penerang ngagai penguna pasal penanggul tu lalu arapka sida bela besabar. Kami enggau naka ulih mutarka penanggul bekal kuasa karan tu enggau lengkas,” ku Min Chong.
Ungkup penerang silik enggau servis, penguna tau betelefon ngagai Palan Servis Penguna Sarawak Energy ti dibuka ninting hari ba lumur 1300-88-3111 tauka e-mel ngagai customercare@sarawakenergy.com.
Penguna mega tau ambi batak aplikasyen Sarawak Energy ba Google Play enggau Apple App Store dikena ngulihka bantu.