SERIAN: Sebuah rumah enggau sebuah entukar 4WD ba Jalai Riih Baki, Kampung Taee angus lengis, malam tadi.

Pengari Palan Operasyen Bomba Sarawak (PGO) madah, sida nerima ripot bekaul penusah nya urung pukul 7.51 malam lalu udah ngerah 18 raban ari Balai Bomba enggau Penyah Penusah (BBP) Serian ngesah endur nya.

Ku iya, penusah angus nyadi bepun ari kebun sebedau nyerarai ngagai rumah peranak ba genturung pendiau dia.

“Penusah angus nya mungkur sebuah rumah enggau sebuah entukar bansa Toyota Hilux ti udah angus 100 peratus.

“Raban bomba udah madamka api chara RECEO enggau ngena dua hos 400 kaki, tiga pam ai ari paip bomba,” ku iya.

PGO madah, nadai peranak dalam rumah nya maya penusah angus nyadi.

Ku iya, penusah angus mujur dipadam penuh pukul 9.18 malam.
“Pengawa ngerara penusah angus nya disaup Raban Charlie,” terang iya baru.